O Concello de Santiago presentou este mércores un proxecto piloto de micromobilidade sostible que busca ofrecer alternativas ao coche privado para desprazamentos curtos dentro da cidade. A iniciativa está sendo desenvolvida en colaboración coa empresa pública Tussa e coa startup Movme, impulsada pola carrocera compostelá Castrosúa. Segundo explicou o concelleiro de Mobilidade, Xan Duro, trátase dun proxecto “pioneiro” que pretende reducir o tráfico e recuperar espazo público para a cidadanía.
O estudo parte da constatación de que moitos desprazamentos dentro de Santiago —especialmente desde o centro histórico— fanse en vehículo privado malia a ampla cobertura do transporte colectivo. A solución proposta consiste na implementación dun sistema de vehículos lixeiros compartidos, deseñados especificamente para este uso e adaptados á escala urbana de Compostela. Estes vehículos, coñecidos como Neno, son eléctricos, ocupan pouco espazo e poderían conducirse desde os 16 anos con carné de ciclomotor.
A análise previa realizada por Tussa e Movme identificou zonas prioritarias como o Hospital Clínico, a Estación Intermodal, o campus universitario ou o barrio das Fontiñas, ademais doutras áreas como San Lázaro, Lamas de Abade ou o polígono do Tambre. O sistema propón conectar estas zonas a través dunha rede de nodos que asegure a dispoñibilidade de estacionamento, un dos principais atrancos dos sistemas de ‘car sharing’ actuais. Tamén se identificaron zonas especiais, como a Cidade da Cultura ou o Hospital de Conxo, onde se buscará a colaboración de institucións como a Xunta ou o SERGAS.
“Estamos a falar dunha solución pensada especificamente para cidades medianas como Santiago, onde os modelos tradicionais de ‘sharing’ non funcionan por falta de volume”, destacou Carlos García, xerente de Movme. “Queremos que a mobilidade sexa transversal, accesible e colaborativa, na que cidadanía, empresas e institucións non compitan, senón que cooperen”.
A fase actual do proxecto céntrase na avaliación do interese por parte de empresas e entidades locais. Segundo avanzaron os responsables, xa se realizaron contactos iniciais e agárdase que nas próximas semanas poidan establecerse compromisos para poñer en marcha o piloto. A produción dos vehículos dependerá deses apoios, pero Castrosúa confirmou a súa dispoñibilidade para afrontar os prazos industriais necesarios.
O concelleiro Duro subliñou que este sistema non substitúe o transporte público, senón que o complementa, e destacou o seu impacto positivo na loita contra o cambio climático, a mellora da calidade de vida e a redistribución do espazo urbano. “Non ten sentido que un coche ocupe un lugar durante horas cando podería ser utilizado por varias persoas ao longo do día”, sinalou.
A proposta foi tamén valorada como unha aposta pola innovación local, pola intermodalidade e pola creación dun modelo exportable a outras cidades, sempre adaptado ás súas especificidades. “Non hai dúas cidades iguais. Esta solución está feita para Santiago, pero pode servir de exemplo a nivel europeo”, concluíu García.
