A Universidade de Santiago de Compostela (USC) será o escenario das xornadas internacionais que abordarán o termo acuñado pola profesora Karma Nabulsi, ‘escolasticidio’, que fai referencia á destrución deliberada e sistemática do sistema educativo palestino como parte da política de xenocidio impulsada pola invasión de Gaza tras os feitos do 7 de outubro de 2023. O encontro terá lugar os días 8 e 9 de maio, organizados pola Cátedra Institucional USC – Araguaney para o Diálogo entre Culturas.
As xornadas, que se inaugurarán o 8 de maio ás 12:00 horas no Salón de Graos da Facultade de Filoloxía, contarán coa participación do vicerreitor de Transformación Dixital e Innovación da USC, Gumersindo Feijoo Costa, e do presidente de honra da Fundación Araguaney – Puente de Culturas, Ghaleb Jaber Ibrahim. O director da Cátedra, Francisco Javier Sanjiao Otero, tamén intervirá na apertura do evento.
O obxectivo principal destas xornadas é analizar os efectos do ‘escolasticidio’ en Palestina, especialmente no sistema educativo, e reflexionar sobre as consecuencias que ten para a infancia e a mocidade nos contextos de conflito armado. A análise tamén se ampliará a outras rexións afectadas pola violencia, como Líbano, Afganistán, Irán e Sáhara Occidental.
Entre os relatorios do día 8 de maio, o catedrático César Domínguez Prieto tratará o concepto de ‘lawfare académico como indicador do fin da civilidade’, seguido por intervencións de Alison Phipps, profesora na Universidade de Glasgow, e de Francisco Javier Sanjiao, quen dará a súa perspectiva sobre os efectos do escolasticidio. A xornada rematará cun debate no que se abordarán as distintas perspectivas de investigadores e académicos.
A segunda xornada, o 9 de maio, terá lugar no Auditorio da Facultade de Ciencias de Comunicación, onde se realizará unha benvida oficial a cargo de Javier Sanjiao, Ghaleb Jaber Ibrahim e a decana do centro anfitrión, Ana Isabel Rodríguez Vázquez. A xornada contará tamén con intervencións destacadas, como a de Mónica Bernabé, xornalista de investigación, quen falará sobre o analfabetismo e apartheid de xénero en Afganistán. Tamén intervirán Natalia Calfat e Vicente Ferraro, que tratarán o escolasticidio en Líbano e Palestina.
O evento servirá tamén para analizar as consecuencias do escolasticidio en Irán e Sáhara Occidental, cunha intervención de Alireza Omid Bakhsh, catedrático na Universidade Allameh Tabataba’i (Irán), e de María González Flores, investigadora da Universidade da Coruña, que pecharán a xornada cun debate moderado por Sarah Vidal Horta, investigadora da USC.
Este encontro forma parte das accións que a USC está a desenvolver a través da Comisión para o desenvolvemento de accións a prol da comunidade universitaria de Palestina, creada polo Consello de Goberno da universidade compostelana.
