A Xunta informou “favorablemente” a proposta do novo Máster en Matemáticas da Universidade de Santiago de Compostela (USC), que se impartirá a partir do curso 2026-27. Desta forma, ambas as institucións acordaron o inicio dos trámites para a súa autorización.
Así o trasladou na mañá deste venres o conselleiro de Educación, Ciencia, Universidades e FP, Román Rodríguez, á vicerreitora de Titulacións e Internacionalización da USC, María José López, e ao decano da Facultade de Matemática, Alberto Cabada, nunha reunión na que participou tamén o secretario xeral de Universidades, José Alberto Díez.
Isto significa que o posgrao regresará á oferta educativa tras un ano de parón. Desta forma, mantense a decisión tomada polo Goberno galego de non impartilo no curso 2025-26 por non cumprir co mínimo de alumnos, o cal era unha demanda da comunidade educativa, apoiada pola propia Facultade, a USC e mesmo o Concello.
No encontro deste venres, o conselleiro agradeceu a disposición da Universidade de traballar conxuntamente para reformular o máster, de forma que este resulte “máis atractivo” para os estudantes e avanzar na calidade e a especialización. Rodríguez asegurou que se dá “cumprimento” ao seu “compromiso” de seguir ofertando a titulación tras a súa renovación.
Segundo trasladou a semana pasada o reitor da USC, Antonio López, en declaracións aos medios, esta nova proposta substituirá á titulación anterior, “con algunhas adaptacións e formulacións diferentes”.
A partir de agora, a USC iniciará os trámites administrativos establecidos na normativa para solicitar a autorización oficial da oferta do máster. Esta deberá incluír tamén informe por parte da Axencia para a Calidade do Sistema Universitario de Galicia (ACSUG) e aprobación definitiva por parte do Consello Galego de Universidades.
SEN MOTIVOS PARA CELEBRAR O ACORDO
A Plataforma en Defensa do Mestrado en Matemáticas sinalou que “non ve motivos” para celebrar o acordo anunciado entre a Consellería de Educación e a Universidade de Santiago de Compostela, xa que supón “un retorno” ao momento de partida e “non garante en absoluto” a continuidade real do máster.
Nun comunicado, a plataforma sinala que o “dano xa esta feito” porque unha xeración de estudantes “perderá a oportunidade” de cursar este máster en Galicia e considera que a reputación da Facultade de Matemáticas foi “severamente danada” ante a “falta de respostas claras e o abandono institucional”.
Así mesmo, tacha de “insuficiente” o acordo porque “non resolve” a raíz do problema: “o rexeitamento da singularidade o máster, adoptado sen informe técnico, contra o criterio da presidencia da ACSUG e sen respaldo de ningún órgano académico nin científico”.
Finalmente, a Plataforma avanzou que seguirá traballando con “responsabilidade e firmeza” para “reparar o dano causado” e acabar coa “lesión continuada” da autonómica universitaria que “pon en risco” ao sistema público de educación superior de Galicia.
