Os tempos de espera nos semáforos de Santiago están a xerar un número crecente de queixas entre a veciñanza, especialmente en zonas como a rúa Rosalía de Castro ou a avenida de Xoán Carlos I, onde moitas persoas confesan que cruzan en vermello pola longa duración do vermello e o curto intervalo do verde. A situación repítese en puntos como o semáforo da rúa da Fonte de Santo Antonio, fronte ao Derby, onde o ciclo completo chega aos 1:40 minutos, facendo longa a espera, especialmente en horas punta ou con mal tempo.
Na rúa Rosalía de Castro, fronte á rúa que dá acceso ao campus universitario, moi transitada por estudantes todas as mañás, o semáforo tarda 1:30 minutos en cambiar a verde, o que levou a varias persoas entrevistadas por Xornal de Compostela a admitir que cruzan cando aínda está en vermello. “Agora considero que esta situación está bastante mal”, afirmou unha moza nun dos pasos de peóns da zona. “O tempo é súper curto para cruzar e a espera súper longa. Eu acabo cruzando en vermello, e iso é perigoso”, engadiu.
Outras persoas coinciden. “Tarda bastante en poñerse en verde e téñoo cruzado en vermello máis dunha vez”, comentou outra rapaza no mesmo punto. Un rapaz engadiu que “tarda a de Deus e xente ten moi pouco tempo”.
Na avenida de Xoán Carlos I, a situación repítese. Dúas mozas recoñecen que, en días nos que van con présa, optan por cruzar aínda que o semáforo estea en vermello se non vén ningún coche. “Levamos présa e sen non ven ningún coche, pasamos”, comentaron.
Durante a campaña municipal de 2023, a actual alcaldesa e por aquel entón candidata, Goretti Sanmartín, xa recollía estas demandas da veciñanza e comprometíase a revisar os tempos dos semáforos da cidade. 
“Está aprobado en pleno que se faga a revisión de todos os pasos de peóns para que á xente lle dea tempo”, aseguraba entón. Sanmartín destacaba a dificultade de persoas maiores ou con mobilidade reducida, que ás veces “nin cruzan en verde porque saben que non lles vai dar tempo”. “Hai problemas graves para iso”, concluía.
A situación actual pon de manifesto que esa revisión aínda non se concretou, malia estar acordada no Pleno. A realidade nos pasos de peóns composteláns é que as esperas prolongadas e o escaso tempo para cruzar están levando a unha práctica habitual e perigosa: cruzar en vermello. Un hábito que, alén de supoñer un risco evidente, revela un problema estrutural de mobilidade peonil na cidade.
A demanda cidadá apunta a unha solución que non require grandes investimentos: axustar os tempos dos semáforos para facer máis amable e segura a mobilidade a pé en Santiago, especialmente nas zonas con máis tránsito ou poboación vulnerable.
