O venres 28 de xuño celébrase o Día Internacional do Orgullo LGBTIQ+, unha data que conmemora a loita e a resistencia do colectivo ante a discriminación e a inxustiza. Ano tras ano, os membros do colectivo enchen as rúas de todo o mundo para alzar a voz e reivindicar uns dereitos que lles corresponden e que moitas veces se ven menosprezados ou privados. Unha xornada de visibilización, pero tamén de reflexión sobre os retos que quedan pendentes.
Galicia, como o resto de España e o mundo, é un escenario no que continuamente suceden crimes de odio contra o colectivo. Son miles as persoas que reciben agresións tanto verbais como físicas por razón da súa orientación sexual ou identidade de xénero.
Segundo o Informe da Federación Estatal de Lesbianas, Gais, Trans, Bisexuales, Intersexuales y más (FELGTBI+), publicado este ano, as persoas pertencentes ao colectivo LGTBIQ+ afirmaban ter sufrido 57.000 agresións físicas ou sexuais nos últimos 5 anos, mentres que os datos que rexistrou o Ministerio de Interior diminuían a 1.738 actos de odio no mesmo período. A diferenza tan destacable nas cifras amosa a dificultade de moitas das vítimas para denunciar e o medo que estas teñen a sufrir consecuencias ou incluso a ver como ninguén fai nada por elas.
As páxinas dos nosos xornais énchense de titulares sobre agresións homófobas, o que constata que é unha realidade moi preocupante. O día que eses titulares desaparezan será cando sexamos libres de verdade, cando poidamos saír á rúa sen medo de coller da man á nosa parella, sen medo de ir vestidos ou vestidas como nos gusta, sen medo de expresarnos libremente, sen medo de expresar o noso amor e, sobre todo, sen medo de ser nós mesmos e nós mesmas. O respecto e a liberdade aínda está por alcanzar, e por iso é fundamental seguir loitando.
Neste momento non existe esa liberdade, e por iso debemos seguir alzando a voz, acudindo ás mobilizacións e defendendo os nosos dereitos como sociedade e comunidade. O silencio só fai que todos aqueles que amosan o seu odio contra o colectivo teñan máis enerxía e se crean con máis dereito para menosprezar, agredir, insultar e ridiculizar. A forza da comunidade e a visibilidade son as ferramentas principais para combater ese odio.
Son múltiples as iniciativas que se crean arredor desta problemática e que cada día realizan actividades e esforzos por representar a toda a comunidade LGBTIQ+. En Compostela, existen moitas asociacións, entidades e persoas comprometidas que traballan para promover a igualdade e o respecto, organizando eventos, charlas e moitas máis actividades para o colectivo.
Este ano, se queres participar na celebración e nas reivindicacións polo día do orgullo, en Compostela terán lugar diferentes actividades por parte da iniciativa municipal ‘Compostela diversa’. Para comezar, dende o día 27 ao 30 de xuño, levarase a cabo unha campaña de dinamización e visibilización tanto por parte dos concellos na vía publica como por parte dos comercios, bares, restaurantes e aloxamentos. Os lugares da vía pública que contarán con iluminación e decoración en conmemoración desta data serán: a Alameda, o Pazo de Raxoi, a Oficina Municipal de Turismo, a Praza Roxa, o Mercado de Abastos – Rúa das Ameas, Rúa doa Bautizados, a Rúa das Casas Reais e a Rúa da Raíña.
Por outra banda, o venres 28 terá lugar a lectura da Declaración Institucional 28X na Praza do Obradoiro ás 10 da mañá. Ademais, o sábado 29, de 7 da tarde a 12 da noite poderase desfrutar dun programa lúdico, artístico e poético moi completo na Praza de Mazarelos.
Por parte da organización Avante LGBT Compostela, o venres 28 a partir das 14 haberá unha foliada e micro aberto no parque de Belvís e unha manifestación que sairá dende a praza 8M ás 20 da tarde para reivindicar o día do orgullo.
