A Xunta e o Concello de Santiago de Compostela acordaron este xoves impulsar un “protocolo marco” para o aparcadoiro e a ordenación urbana da contorna e os accesos do Hospital Clínico. Neste sentido, a Administración autonómica valorará achegar o 80 por cento do orzamento, mentres que o 20 restante poríao o goberno local.
Tras meses de intercambios de propostas, este é o principal consenso ao que se chegou na primeira reunión tras iniciarse a nova etapa do Goberno galego, que inclúe novas caras á fronte de Sanidade (Antonio Gómez Caamaño) e de Planificación de Infraestruturas (María Martínez Allegue).
Xunto a estes, ao encontro que permitiu desbloquear o proxecto acudiron a alcaldesa da cidade, Goretti Sanmartí, e os seus concelleiros de Mobilidade e Urbanismo, Xan Duro e Iago Lestegás, entre outros. Ambas as partes recoñecían en días pasados que o estaban preto de lograr un consenso.
De tal forma, este xoves acordouse que en próximas semanas ambas as administracións pecharán este protocolo marco de colaboración, no que xa se concretará a redacción do proxecto de interese autonómico (PIA), que permitirá axilizar trámites, para a ordenación da contorna do Clínico e poder construír o novo aparcadoiro anexo ao hospital.
Sobre o financiamento das actuacións do PIA, ambas as partes acordaron valorar que a Xunta achegue o 80 da obra e o goberno local o 20 restante. Iso si, o Executivo galego comprometerase tamén a cofinanciar actuacións de saneamento e abastecemento municipal por 3,5 millóns de euros.
Nesta reunión tamén se puxeron en común os avances realizados nos últimos meses no ámbito da mobilidade e o aparcadoiro. Por exemplo, a Xunta habilitou un novo aparcadoiro con 141 prazas para traballadores do hospital, mentres que o Concello puxo en funcionamento outras 151 nunha parcela de 3.000 metros cadrados xunto ao edificio do CiMUS.
En paralelo, o Goberno galego reivindica o seu investimento de 70 millóns de euros na ampliación do Clínico –actualmente, as obras están centradas en executar o edificio C– e o arranque das obras do Centro de Protonterapia, ao que se destinan outros 20 millóns.
