A Cámara de Comercio de Santiago de Compostela reuniu os días 6 e 7 de xuño a emprendedores, profesionais do deseño e veciñanza de Vedra na Local Creative Jam, un encontro de innovación colaborativa no Centro de Emprendemento ‘A Estación’, no marco do proxecto europeo ATLANTIC INNOBLUE COMMUNITIES (ATLIC). A iniciativa, cofinanciada pola Unión Europea a través do programa Interreg Espazo Atlántico, procura activar novos modelos de desenvolvemento local con base na creatividade, a economía azul e o aproveitamento sostible dos recursos naturais.
Durante dous días, os participantes traballaron en equipos para dar resposta a retos vinculados ao desenvolvemento sostible, a valorización do ecosistema fluvial do Ulla e o impulso de modelos de xeración enerxética limpos para o rural galego. Para iso, contaron con actividades formativas e obradoiros que axudaron a enfocar as propostas desde a innovación tecnolóxica e ambiental. Entre eles destacaron as sesións de Rubén Villasenín Iglesias, da Asociación AMABUL, cun taller sobre ameazas ambientais, e Asier Epelde Piñeiro, cunha introdución práctica ao uso da intelixencia artificial en proxectos creativos.
O evento pechouse coa presentación pública dos proxectos diante dun xurado especializado integrado por Juan Manuel Cernadas Méndez (Concelleiro de Deportes e Novas Tecnoloxías), Pablo López Pérez (facilitador de procesos en Implicatum) e Belén Mendoza (responsable de Proxectos Europeos na Cámara).
O proxecto gañador foi ‘MAPA’, unha proposta baseada na eliminación de especies invasoras no río Ulla para a súa transformación en materiais orgánicos útiles para a construción e o deseño de xoguetes. O obxectivo é dobre: recuperar o ecosistema fluvial e reducir o uso de plásticos, promovendo unha economía circular dende o local.
O segundo premio foi para o equipo CACTUS, que ideou un sistema híbrido de xeración de enerxía limpa combinando o movemento da auga e a luz solar. A proposta, pensada para responder a situacións de vulnerabilidade enerxética, inspirouse nas consecuencias dun apagón e aposta pola autosuficiencia eléctrica en zonas rurais.
Ademais dos premios en material electrónico, os equipos premiados foron seleccionados para participar na International Creative Jam que se celebrará en Irlanda, onde poderán dar a coñecer os seus proxectos nun contexto europeo e seguir desenvolvendo solucións creativas co apoio da rede ATLIC.
