Os alcaldes de Boqueixón, Ovidio Rodeiro, e Vedra, Carlos Martínez, achegáronse esta semana ata o entorno do Pico Sacro para coñecer de primeira man o labor que está a realizar o grupo de participantes no campo internacional de voluntariado ‘Monte Sacro’, unha iniciativa que busca combinar a protección do patrimonio coa convivencia intercultural e a participación xuvenil.
Durante a visita, ambos rexedores tiveron ocasión de dialogar cos quince mozos e mozas de entre 18 e 30 anos que, procedentes de distintos puntos do Estado e do estranxeiro, están a desenvolver tarefas de limpeza, restauración e posta en valor dos espazos naturais e culturais que rodean o coñecido Monte Ilicino, en Boqueixón.
Este campo de traballo, que se prolongará durante dúas semanas, está coorganizado polos Concellos de Vedra e Boqueixón e conta co respaldo da Dirección Xeral de Xuventude, Participación e Voluntariado da Xunta de Galicia. Na súa primeira semana, os voluntarios acometeron tamén actuacións nas inmediacións do conxunto patrimonial de San Xoán da Cova, no municipio de Vedra, onde levaron a cabo tarefas de acondicionamento e eliminación de especies vexetais invasoras que ameazaban a vexetación autóctona e a conservación do enclave.
A segunda semana está centrada no ámbito do Pico Sacro, un lugar cargado de simbolismo na tradición xacobea e na mitoloxía popular galega. Os traballos inclúen a limpeza de sendeiros, o control de especies invasoras e outras tarefas de recuperación ambiental.
Tanto Ovidio Rodeiro como Carlos Martínez puxeron en valor a importancia deste tipo de proxectos para implicar á mocidade na conservación do medio e do patrimonio, ao tempo que favorecen o intercambio cultural e a formación en valores de cooperación e respecto polo territorio. “Estes campos de voluntariado son unha oportunidade para que os máis novos descubran o noso patrimonio e contribúan á súa protección”, destacaron.
A experiencia, ademais de incluír o traballo voluntario, ofrece aos participantes actividades formativas, visitas culturais e espazos de convivencia, reforzando o carácter educativo e social da iniciativa.
A contorna do Pico Sacro, un dos cumes máis emblemáticos da comarca, convértese así en escenario dun proxecto que une xuventude, patrimonio e territorio, coa colaboración institucional dos concellos implicados e a administración autonómica.
