As familias do CPI Plurilingüe de Vedra advertiron dunha situación que cualifican de “insostible” pola falta de profesorado e de persoal de apoio, especialmente na área de atención á diversidade, o que, segundo denuncian, “repercute directamente na calidade da atención educativa” dos 441 alumnos e alumnas do centro.
Nun comunicado, a ANPA subliña que o problema é “especialmente grave” en sexto de Educación Infantil, onde aseguran que a Consellería de Educación “ignora a solicitude de desdobre necesario a pesar de contar cun cociente excesivo”. O grupo, explican, está formado por 26 nenos e nenas, entre os que se atopa alumnado con necesidades educativas especiais que require atención individualizada, unha situación que consideran “incompatible cunha soa mestra na aula”.
As familias critican que a administración autonómica “incumpre o seu propio compromiso de garantir a atención ao alumnado con necesidades educativas especiais e de apoiar aos centros rurais”. “Resulta inadmisible que se castigue novamente ao ensino no rural, que xa funciona con recursos mínimos”, engaden.
A ANPA reclama á Xunta máis profesorado de apoio e a creación inmediata do desdobre solicitado, co obxectivo de asegurar unha atención adecuada e equitativa para todo o alumnado. O colectivo lembra que a situación afecta tamén a outras etapas educativas do centro e que “a sobrecarga do profesorado compromete o dereito básico a unha educación de calidade”.
RESPOSTA DA CONSELLERÍA
Pola súa banda, a Consellería de Educación, Ciencia, FP e Universidades respondeu ás críticas asegurando que o CPI Plurilingüe de Vedra dispón do profesorado necesario para atender ao seu alumnado, e que todas as aulas manteñen cocientes por debaixo do máximo permitido pola normativa vixente. Fontes do departamento autonómico precisaron que o centro conta con cinco docentes na etapa de Infantil, un deles a media xornada incorporado este curso como reforzo, para atender tres aulas con 53 alumnos en total.
A Xunta defende que a aula de sexto de Infantil, con 23 nenos e nenas, pode organizarse “con profesorado suficiente” e que a dirección do colexio “dispón de autonomía” para decidir se aposta polo desdobre ou pola co-docencia. Ademais, subliña que, cos recursos actuais, o centro podería acoller ata 585 estudantes, fronte aos 441 matriculados este curso, o que supón 144 prazas libres. Con estes datos, o departamento educativo insiste en que o cadro de persoal é axeitado e que o funcionamento do CPI de Vedra se axusta aos criterios establecidos pola administración.
