O concelleiro do Partido Popular de Santiago, José Antonio Constenla, instou ao goberno local a impulsar un Plan Director de Infraestrutura Verde e Biodiversidade co obxectivo de garantir a seguridade e conservación das zonas verdes da cidade. A proposta busca establecer unha diagnose precisa do estado do arborado e dos espazos naturais, así como definir liñas de actuación para mellorar a súa xestión e preservación.
Durante a súa intervención, Constenla puxo o foco na falta de avances do Plan Director da Alameda, que considera un exemplo do “desleixo” na planificación ambiental por parte do executivo municipal. “A Alameda é un dos espazos máis emblemáticos de Compostela e seguimos sen noticias do seu plan de conservación”, afirmou.
O edil popular lembrou que Santiago conta cun dos patrimonios arbóreos máis ricos de Europa, mais considera que o coidado que recibe está lonxe de reflectir a suposta preocupación ambiental do goberno local. Advertiu de que en días de meteoroloxía adversa son frecuentes as caídas de árbores de gran porte, especialmente na Alameda e na carballeira de San Lourenzo, sen que exista un sistema coñecido de prevención ou avaliación de riscos.
Constenla tamén mencionou o río Sarela como outro dos puntos críticos: “A marxe fluvial atópase nun estado de deterioro progresivo, cunha biodiversidade sen control e árbores caídos que, segundo denuncian os veciños, poden pasar meses sen seren retirados”, declarou.
Segundo a proposta presentada polo Partido Popular, o Plan Director permitiría avaliar o estado real das zonas verdes compostelás, establecer obxectivos estratéxicos e deseñar accións concretas para conservar, mellorar e potenciar o patrimonio natural da capital galega. A formación considera que esta ferramenta é imprescindible para garantir unha xestión responsable e sostida das áreas verdes e responder ás preocupacións crecientes da cidadanía.
