As estatuas de Ezquiel e Xeremías, dúas das figuras do Pórtico da Gloria atribuídas ao Mestre Mateo, foron presentadas este luns no Museo do Pobo Galego tras chegar á cidade nunhas caixas construídas expresamente para o traslado. O acto, celebrado na Ala Sur, contou coa participación da alcaldesa Goretti Sanmartín e da primeira tenenta de alcaldesa María Rozas, ademais de representantes do Padroado do museo e do equipo técnico encargado da recepción.
Sanmartín subliñou que a xornada constitúe “un día histórico”, ao ser a primeira vez que o Concello recupera unhas pezas incautadas durante o franquismo mediante unha sentenza firme. A rexedora destacou o carácter “simbólico e pioneiro” da devolución e reivindicou que este proceso “abra camiño para que outros bens apropiados pola familia Franco regresen aos seus lexítimos propietarios, que non son outros que o pobo galego”. Mencionou exemplos como o Pazo de Meirás, a Casa Cornide ou as pías bautismais de Moraima e Muxía, lembrando que “tiveron que pasar cincuenta anos para que esta restitución fose posible”.
A alcaldesa expresou o agradecemento do goberno local ás administracións e equipos técnicos implicados, desde os executivos municipais que abriron a vía xudicial en 2017 até a dirección patrimonial da Xunta e do Estado. Avanzou tamén que as esculturas quedarán expostas ao público a partir do 11 de decembro, acompañadas de actividades e materiais que contextualizarán “un proceso que fala de historia viva, memoria colectiva e da loita do pobo galego polo seu patrimonio”.
Pola súa banda, Rozas definiu a chegada das estatuas como “un día feliz para Santiago e para a democracia”. Lembrou que “os vestixios do franquismo continúan presentes en rúas, monumentos e institucións”, e que estas esculturas foron “un exemplo de como a familia Franco seguiu apropiándose do que é de todas e de todos”. A primeira tenenta de alcaldesa reivindicou o traballo das persoas que iniciaron o procedemento, entre elas Martiño Noriega, Xaquín Monteagudo e Ricardo Gurriarán, así como o labor de investigadores, xuristas e do goberno que deu continuidade ao proceso.
Tras as intervencións, Sanmartín e Rozas participaron na apertura das caixas para permitir que o persoal conservador verificase o estado das dúas esculturas, que permanecen xa depositadas no Museo do Pobo Galego á espera da súa exhibición temporal.
