O proxecto Física Ciborg, organizado polas Universidades de Santiago de Compostela e de València, ofrecerá a próxima semana en Compostela dúas actividades gratuítas dentro da Semana da Ciencia 2024. Trátase dunha ruta científica pola cidade e dun obradoiro histórico de experimentos, ambas cun enfoque didáctico e histórico. As actividades son de libre acceso, aínda que con límite de aforo, e están pensadas para mocidade e público xeral interesado en ciencia e historia.
A ruta científica, que terá lugar o luns 11 de novembro, contará con dúas sesións ás 10:00 e ás 18:00 horas. O punto de partida será na Praza da Universidade, desde onde se fará un percorrido a través do centro histórico ata a Facultade de Física da USC no Campus Sur. Segundo informan dende a organización do proxecto, a actividade busca presentar Santiago “dende unha nova óptica”, observando os cambios científicos e tecnolóxicos que configuraron a cidade desde o século XIX ata a actualidade. Durante a ruta, destacaranse espazos como antigos laboratorios, observatorios e boticas, analizando as prácticas científicas e o contexto histórico en que xurdiron, abordando aspectos sociais, económicos e culturais.
O martes día 12, tamén en sesións de mañá e tarde, a Facultade de Física da USC acollerá un obradoiro práctico onde os asistentes poderán reconstruír instrumentos históricos utilizando materiais modernos. A actividade está enfocada a participantes maiores de 15 anos e contará coa creación dunha réplica dun sacarímetro do século XIX (utilizado para medir concentracións mediante polarización) e a reprodución do famoso experimento dos hemisferios de Magdeburgo. Este obradoiro permite afondar en conceptos fundamentais como a polarización, o baleiro, e a reprodución experimental.
Para ambas as actividades, é necesario reservar praza previamente mediante a súa páxina web https://fisicaciborg.blogs.uv.es/o-proxecto/
