O Bloque Nacionalista Galego amosou este martes o seu rexeitamento ao plan económico financeiro presentado polo goberno municipal de Teo, encabezado polo Partido Popular, por considerar que carece da información necesaria para avaliar a súa eficacia. Segundo sinalou o portavoz municipal do BNG, Eloi Devesa, o documento non recolle nin os motivos do incremento do gasto que levou ao Concello a incumprir a regra de gasto nin as medidas concretas que permitirán acadar o superávit previsto para 2026.
Devesa advertiu que o plan “non explica con claridade que partidas provocaron o desequilibrio orzamentario nin cales se verán afectadas por recortes ou axustes” e lamentou que o executivo local presente “un documento que non cumpre os requisitos de concreción esixidos pola normativa vixente”. A norma á que se refire é a coñecida como lei de estabilidade orzamentaria, aprobada durante o mandato de Mariano Rajoy, e que fixa un límite de crecemento do gasto público para as administracións locais.
“A lei é cuestionable, pero foi impulsada e defendida polo propio PP, que agora é o primeiro en incumprila”, afirmou o voceiro nacionalista. Para o grupo do BNG en Teo, o executivo municipal está a incumprir unha lexislación que el mesmo contribuíu a establecer, sen ofrecer unha análise detallada do contexto financeiro actual nin medidas realistas para corrixilo.
O plan presentado polo goberno local é unha esixencia legal derivada do incumprimento da regra de gasto, o que obriga a elaborar un documento que garanta a recuperación do equilibrio financeiro en futuros exercicios. Porén, para o BNG, o documento carece de solidez técnica e semella máis ben un “brinde ao sol”, sen garantías de cumprimento real.
O grupo nacionalista insta ao executivo local a reformular o plan con criterios de claridade, transparencia e rigor, e reclama que se informe á veciñanza de Teo sobre a situación real das finanzas municipais e as consecuencias que podería ter este plan sobre os servizos públicos.
