A Unión de Cidadáns Independentes (UCIN) de Galicia denunciou publicamente a perda de financiamento europeo no Concello de Ames, unha situación que atribúe tanto á xestión do goberno local como á actuación dos grupos da oposición. O coordinador da formación, José Luis Calo, asegurou que nos últimos anos o municipio deixou pasar “oportunidades clave” vinculadas a programas de desenvolvemento urbano sostible.
Segundo expón UCIN, a falta de execución de determinados proxectos dentro dos prazos establecidos provocou a renuncia ou perda de fondos europeos, o que, na súa opinión, supón un “grave prexuízo económico e social” para a localidade. Entre as consecuencias sinaladas figuran a perda de investimentos en mobilidade e infraestruturas, a necesidade de financiar con recursos propios actuacións inicialmente subvencionadas e o atraso na implantación de servizos básicos para a veciñanza.
“Estamos a falar de cartos que Ames non pode permitirse perder, e que evidencian unha xestión deficiente e sen planificación”, afirmou Calo.
A formación tamén puxo o foco no papel dos grupos da oposición municipal —Partido Popular, BNG e Ames Espazo Común— aos que acusa de non exercer unha labor de control suficiente. Segundo indicou o coordinador de UCIN, “perciben retribucións públicas con cargo aos orzamentos municipais, pero non están esixindo responsabilidades políticas nin fiscalizando a acción de goberno”.
Neste sentido, engadiu que resulta “incomprensible” que, ante a perda de fondos europeos e os problemas na execución de obras, a oposición manteña unha actitude que cualificou de “pasiva e insuficiente”.
UCIN recolle tamén queixas veciñais relacionadas coa xestión municipal, entre elas deficiencias en obras executadas, atrasos en proxectos e falta de seguimento das actuacións. “A veciñanza de Ames está a pagar as consecuencias dunha mala xestión e dunha oposición desaparecida”, sinalou Calo.
Ante esta situación, a formación reclama a posta en marcha dunha auditoría completa da xestión dos fondos europeos, así como transparencia sobre os proxectos non executados e a depuración de responsabilidades políticas. Ademais, insta aos grupos da oposición a asumir un papel máis activo na fiscalización da acción municipal.
