O Movemento Sumar Galicia prevé celebrar o vindeiro sábado 23 de maio a súa Conferencia Política Nacional na Casa da Cultura do Milladoiro, no Concello de Ames, baixo o lema ‘Galicia fai fronte: dereitos e futuro’. A xornada reunirá á militancia e aos órganos da organización co obxectivo de definir as liñas estratéxicas de cara ás próximas citas electorais.
O secretario xeral da formación, Paulo Carlos López, sinalou que este encontro constitúe “un momento fundamental para ordenar o debate político, escoitar á militancia, abrir espazos de participación e decidir a estratexia para as próximas eleccións municipais”. Neste proceso previo, as asembleas comarcais e os órganos sectoriais elaborarán propostas que se incorporarán a dous documentos: un de carácter xeral, titulado ‘Horizonte de Cambio’, e outro centrado no ámbito municipal.
A apertura do evento contará coa intervención da presidenta do Movemento Sumar Galicia e portavoz no Congreso, Verónica Barbeiro, xunto co propio secretario xeral. López subliñou que a organización busca consolidarse como un actor político “referente”, aínda que con “axenda, tempos e forzas propias”, de cara tanto ás eleccións municipais como ás xerais.
A programación inclúe un debate político xeral ás 15:30, seguido dunha mesa municipalista a partir das 17:30, centrada na estratexia de Sumar Galicia para as eleccións locais de 2027. Este espazo contará coa participación de distintas candidaturas municipalistas e terá como finalidade establecer vías de colaboración e coordinación política.
Segundo explicou López, esta mesa pretende “abrir vías de entendemento e favorecer dinámicas de cooperación política no ámbito local”, apostando pola creación de candidaturas amplas en cidades onde non existen, como A Coruña ou Vigo, ou pola colaboración con espazos xa consolidados, como en Ferrol ou Compostela.
O encontro en Ames busca así avanzar na definición dunha folla de ruta que, segundo a organización, permita “consolidar gobernos progresistas a través dunha axenda transformadora ou xerar cambios de goberno alá onde goberne o Partido Popular”.
