O Concello de Santiago de Compostela está a traballar en medidas para mellorar a xestión das colas de acceso á Catedral tras as preocupacións trasladadas pola Asociación de Veciños Fonseca. Así o confirmou a portavoz do goberno local, Míriam Louzao, quen explicou que o Executivo comparte a necesidade de ordenar os fluxos turísticos nesta zona do casco histórico.
Segundo indicou, o goberno municipal mantivo xa contactos co Arcebispado para abordar esta cuestión, aínda que recoñeceu que persiste unha falta de consenso sobre a responsabilidade na organización destas esperas. Neste contexto, Louzao apuntou que existe unha “disquisición” sobre que departamento debe asumir a xestión das colas.
A portavoz tamén sinalou a ausencia de coordinación coa administración autonómica. Neste sentido, lamentou que continúa pendente unha reunión con Turismo de Galicia que non se produciu “case tres anos despois”, a pesar de que o Arcebispado considera necesaria a participación deste organismo na procura dunha solución conxunta.
Como resposta á situación, o Concello aposta pola implantación de sistemas de sinalización intelixente vinculados ao Plan de Turismo Sustentable. Esta ferramenta permitiría ofrecer información en tempo real sobre o estado das colas, seguindo un modelo semellante ao que xa se emprega para a recollida da ‘Compostela’.
“Sería ideal ter unha indicación do número de persoas que hai nesa cola”, explicou Louzao, quen subliñou que o obxectivo é que os visitantes poidan reorganizar a súa visita á cidade e evitar esperas prolongadas, distribuíndo así os fluxos turísticos por outros espazos.
En canto aos prazos, a portavoz confirmou que o contrato para a implantación deste sistema xa está en marcha e que a colocación das novas sinais tecnolóxicas está prevista para os vindeiros meses.
