A Policía Local de Ames detivo na mañá deste martes a unha persoa sobre a que pesaba unha orde de procura e detención para o seu ingreso en prisión, emitida por un xulgado de Pontevedra, segundo informou o propio corpo de seguridade.
Os feitos tiveron lugar na avenida da Maía, en Bertamiráns, cando os axentes observaron a un individuo que circulaba nun patinete eléctrico transportando unha motoserra. Ante esta situación, procederon a darlle o alto co obxectivo de realizar a correspondente identificación.
Unha vez comprobada a súa identidade, os axentes verificaron que o individuo contaba cunha orde xudicial en vigor, polo que foi detido no momento.
Tras a actuación, a persoa foi trasladada ao posto principal da Garda Civil do Milladoiro, onde a Benemérita continuará coas dilixencias pertinentes.
O alcalde de Ames, Blas García, felicitou os axentes polo operativo e puxo en valor “o gran traballo que realizan a diario para facer de Ames un dos concellos máis seguros de Galicia”.
