O coordinador de UCIN Teo, Álex Regueiro, expresou publicamente o seu rexeitamento aos orzamentos municipais de 2025, presentados polo Concello, que ascenden a 2,6 millóns de euros en melloras da rede viaria e outras infraestruturas locais. Esta cantidade supón un incremento de 1,1 millóns respecto ao exercicio anterior.
Segundo explicou Regueiro, a formación non cuestiona a relevancia de mellorar as infraestruturas, mais critica que esta aposta supoña deixar en segundo plano áreas que considera estratéxicas para o futuro do municipio. Entre elas destacou o turismo, o comercio e a cultura, que no seu conxunto recibirán partidas “claramente insuficientes”.
En concreto, os orzamentos reservan 270.000 euros para turismo e comercio, cifra que UCIN Teo cualifica de limitada para apoiar o tecido económico. “O comercio agoniza, os locais pechan e o turismo segue a ser unha oportunidade desaproveitada”, advertiu o coordinador, que reclamou un plan máis ambicioso para dinamizar a economía local.
No ámbito cultural, a dotación prevista é de 700.000 euros, onde se inclúen proxectos de restauración do patrimonio. Regueiro sinalou que isto deixa ás asociacións culturais con recursos moi reducidos: “Son o corazón da vida cultural en Teo e deberían contar cun apoio decidido por parte do Concello”.
Desde UCIN Teo deféndese a necesidade dun maior equilibrio nos investimentos, con estratexias que fortalezcan a cultura, apoien ao pequeno comercio e impulsen o turismo. Para a formación, estes sectores xeran tanto actividade económica como cohesión social.
“Queremos uns orzamentos xustos, que pensen na veciñanza e no futuro do noso municipio”, concluíu Regueiro, quen advertiu de que Teo non pode seguir perdendo oportunidades mentres o comercio local e a cultura “loitan por sobrevivir”.
