O programa Apego continúa a desenvolver a súa programación de actividades para o primeiro semestre de 2026 cun novo espectáculo dirixido ás familias con crianzas pequenas. O Concello de Ames organiza para o vindeiro venres 13 de marzo, ás 18:00, na Casa da Cultura do Milladoiro, a representación da obra ‘Garavanciña’, da compañía Migallas Teatro.
A proposta escénica é unha peza teatral con música en directo inspirada nos contos clásicos, na que se combinan monicreques, cancións e narración oral. O espectáculo estará interpretado por Bea Campos e Ali Otero, que presentan unha versión da coñecida historia na que se introducen cambios nos roles de xénero tradicionais, mantendo a dimensión fantástica do relato.
A actividade será de balde e está pensada para familias con crianzas a partir de 1 ano de idade. O espectáculo terá lugar no auditorio da Casa da Cultura do Milladoiro, dentro da programación de iniciativas que o programa Apego promove durante os primeiros meses do ano.
INSCRICIÓN PREVIA ATA O 12 DE MARZO
As persoas interesadas en asistir deberán realizar unha inscrición previa, xa que as prazas se asignarán por orde de recepción das solicitudes. O prazo permanecerá aberto desde o 5 ata o 12 de marzo.
Para formalizar a participación será preciso enviar un correo electrónico ao enderezo normalizacion@concellodeames.gal, indicando nome e apelidos das persoas asistentes, idade das crianzas e un teléfono de contacto. Desde a organización advírtese de que non se admitirán solicitudes fóra de prazo.
Un programa para favorecer a transmisión do galego
O programa Apego é unha iniciativa de dinamización lingüística dirixida ás familias que están a agardar un bebé ou que teñen crianzas entre 0 e 6 anos. O seu obxectivo é promover e apoiar o uso do galego na socialización da primeira infancia, facilitando recursos e actividades que contribúan a integrar a lingua na vida cotiá das familias.
As persoas que desexen participar neste proxecto poden contactar co Servizo de Normalización Lingüística do Concello de Ames a través do correo normalizacion@concellodeames.gal ou do teléfono 662 377 215. Tamén é posible inscribirse cubrindo o formulario ‘Súmate ao apego‘ dispoñible na páxina web do programa, apego.gal.
