A cidade de Santiago de Compostela celebrou este martes a inauguración oficial da súa nova estación intermodal, que a partir de agora levará o nome de Daniel Castelao, en homenaxe ao intelectual galeguista e símbolo da loita democrática. O novo edificio de viaxeiros comezará a operar mañá, tras unhas obras que supuxeron un investimento global de máis de 53 millóns de euros, segundo destacou o secretario de Estado de Transportes, José Antonio Santano, durante o acto.
A alcaldesa, Goretti Sanmartín, cualificou a xornada como “un día histórico para Compostela” e subliñou que a nova estación non só moderniza os servizos ferroviarios da capital galega, senón que contribúe a conectar barrios como Pontepedriña e Sar, elimina barreiras urbanas e ofrece unha praza pública de 1.500 metros cadrados. Sanmartín aproveitou tamén para recordar o centenario da anexión de Conxo, subliñando a continuidade histórica da chegada do tren a Santiago dende a apertura da liña Carril-Cornes en 1873.
A rexedora fixo fincapé na dimensión simbólica do nomeamento da estación, que responde a un acordo unánime do pleno municipal de 2019. “Colocar o nome de Castelao na fronte deste edificio é un xesto de dignidade, humano e político”, afirmou, destacando o vínculo do homenaxeado co ferrocarril e coa construción dun país con infraestrutura e memoria. “Este lugar nunca será un non-lugar”, engadiu, en alusión ao concepto do antropólogo Marc Augé.
Pola súa banda, Santano destacou que a actuación en Santiago se inscribe nunha estratexia estatal de transformación ferroviaria que contempla tamén estacións intermodais en Ourense, Lugo e A Coruña, e que xa leva máis de 1.600 millóns de euros investidos en Galicia dende 2018, tanto en alta velocidade como na modernización da rede convencional. No caso compostelán, o novo edificio multiplica por máis do dobre o espazo do vestíbulo anterior, pasando de 435 a 1.100 metros cadrados, con deseño funcional, eficiente e adaptado á cidade.
O secretario de Estado anunciou ademais que está en marcha a construción dun aparcadoiro en altura de tres plantas, con 900 prazas, que triplicará a capacidade actual e permitirá facilitar o acceso á estación sen depender do coche particular. Tamén se contempla o reaproveitamento do antigo edificio de viaxeiros para usos docentes e técnicos.
A demanda de usuarios, especialmente trala mellora das frecuencias de alta velocidade, confirma a necesidade da infraestrutura: Santiago rexistrou un aumento do 121% no número de viaxeiros respecto a 2024, ano xa considerado récord.
Goretti Sanmartín aproveitou o acto para pedir que a chegada desta nova estación abra a porta a novas conexións ferroviarias con vilas da contorna, como Lugo ou a Mariña, e para retomar a reivindicación de completar as infraestruturas pendentes, como o Orbitaliño, que uniría os polígonos empresariais coas principais vías de acceso. Tamén lanzou o soño dunha futura estación de mercadorías que diversifique a economía compostelá.
O nomeamento de Castelao vén completar un mapa simbólico da cidade onde as súas principais infraestruturas de transporte levan nomes de referentes da cultura galega: Rosalía de Castro no aeroporto, e agora Daniel Castelao na estación ferroviaria. “Non hai futuro sen raíces, non hai identidade sen memoria”, concluíu a alcaldesa.
PSOE DE SANTIAGO
O portavoz do PSOE en Santiago, Gumersindo Guinarte, sinalou, con motivo da inauguración este mércores da nova entrada de estación de tren, que este é “un antes e un despois” na mobilidade na capital galega.
“A estación de Santiago é a que máis pasaxeiros move, tanto en ferrocarril como en autobús. Esta inauguración vai facer efectiva a intermodalidad entre transporte por estrada e transporte ferroviario”, valorou o edil socialista en declaracións remitidas aos medios.
O novo edificio de viaxeiros estará operativo a partir deste xoves, de forma que unha pasarela, situada á beira da terminal de autobús, dá acceso ao novo vestíbulo ferroviario. Guinarte destacou que esta apertura supón a “culminación” da “accesibilidade e unión” entre dous barrios de Santiago, o Ensanche e Pontepedriña.
“Manifesta con obras e non con palabras o compromiso do Goberno de Pedro Sanchéz con Santiago de Compostela”, engadiu, á vez que mencionou exemplos como o Orbital, o acceso da autoestrada á Cidade da Cultura e as futuras obras no aeroporto Rosalía de Castro.
