O Concello de Santiago celebrou esta semana dúas novas xuntanzas cos barrios, encontros que —segundo trasladou o propio goberno local— buscan manter un contacto periódico coa veciñanza e avanzar na resolución de necesidades en materia de mobilidade, urbanización e equipamentos. As reunións tiveron lugar os días 2 e 3 de decembro, coa participación da alcaldesa, Goretti Sanmartín, e dos concelleiros Xesús Domínguez e Xan Duro, ademais da tenenta de alcaldesa, María Rozas, no caso da Almáciga.
O primeiro encontro desenvolveuse o martes coa Aba do Pedroso, nunha sesión centrada nas actuacións en marcha por parte da Deputación da Coruña. O executivo municipal informou de que se está a seguir a evolución das obras da senda peonil cara a Figueiras e do asfaltado da estrada DP-7803, actualmente en proceso de licitación. Pola parte municipal, a alcaldesa e os concelleiros explicaron que está en fase de redacción o proxecto para completar a senda peonil entre o cruzamento das rúas Montepío e Carme de Abaixo e o punto quilométrico inicial da estrada autonómica. Tamén avanzaron que se atopa en contratación o plan para pavimentar Bar de Abaixo, Bar de Arriba e a rúa dos Asidros. A reunión permitiu, ademais, recoller peticións dos residentes, compromisos que o goberno asegurou que tentará atender.
A segunda xuntanza celebrouse o mércores na Almáciga, coa asistencia da alcaldesa, da tenenta de alcaldesa e dos edís de Sustentabilidade Ambiental e de Mobilidade. Neste caso, a sesión centrouse no acceso do autobús ao barrio, unha demanda que a veciñanza leva anos reivindicando e que, segundo indicou o goberno local, foi xa atendida nesta lexislatura. Os asistentes trasladaron tamén propostas relativas á reordenación das zonas de aparcamento.
Outro dos puntos relevantes foi a explicación do avance do proxecto ‘Horizonte Compostela’, cuxa execuión repercutirá directamente na Almáciga. O Concello lembrou que esta intervención, financiada con 8,7 millóns de euros de fondos europeos, foi xa presentada ao tecido veciñal e técnico municipal, incluída a directora da área de Urbanismo. Entre as actuacións previstas destaca o elevador ou sistema de acceso vertical que conectará a Almáciga coa parte baixa da cidade para superar a forte pendente.
No encontro repasáronse tamén as melloras de accesibilidade realizadas na rúa de Betanzos e anotáronse diversas necesidades vinculadas ao local social, trasladadas polas persoas asistentes. O Executivo municipal reiterou a súa vontade de dar continuidade a estes encontros, co fin de facer seguimento dos proxectos e manter aberto o diálogo cos barrios.
