A alcaldesa de Santiago de Compostela, Goretti Sanmartín, reclamou este luns en Salamanca unha estratexia común entre administracións, corpos de seguridade e técnicos especializados para facer fronte ao vandalismo que ameaza o patrimonio histórico nas cidades. Foi durante a inauguración das xornadas sobre vandalismo e patrimonio organizadas polo Grupo de Cidades Patrimonio da Humanidade, entidade que actualmente preside.
Sanmartín agradeceu o labor organizativo do Concello de Salamanca e da Comisión de Patrimonio do grupo, ao tempo que puxo en valor a importancia de encontros como este para compartir experiencias e buscar solucións comúns. “O que nos une é a responsabilidade conxunta de conservar os nosos bens para as xeracións vindeiras”, afirmou.
A rexedora compostelá fixo referencia á campaña ‘Frágil’ posta en marcha dende o Concello de Santiago, baseada na metáfora das caixas de envío delicadas. O seu obxectivo, explicou, é concienciar ás persoas visitantes da necesidade de coidar o patrimonio antes mesmo de chegar á cidade.
Sanmartín recoñeceu que en contornas de gran afluencia, como Compostela, “sempre hai quen realiza pintadas ou outros actos que deterioran os espazos patrimoniais”, polo que considerou clave este tipo de foros nos que participan tamén “os corpos de seguridade, o mundo xurídico e o persoal técnico”.
A alcaldesa tamén subliñou que, malia as diferenzas entre as quince cidades do grupo –en arquitectura, tradicións, gastronomía ou linguas–, todas comparten “un selo común e unha obriga ante a humanidade: preservar o seu legado histórico”.
Estas xornadas, que se prolongarán ata mañá, prevén concluír cun documento de propostas que podería ser elevado ao conxunto das administracións públicas para mellorar a resposta fronte aos actos vandálicos que afectan ao patrimonio.
Pola súa banda, o alcalde de Salamanca, Carlos García Carbayo, anunciou que se redactará o ‘Manifesto de Salamanca’ contra o vandalismo, co compromiso de reforzar a cooperación entre administracións e actuar con axilidade para previr o efecto chamada de condutas incívicas, especialmente no caso das pintadas.
A cita conta coa participación de representantes das forzas de seguridade, do poder xudicial e de expertos en conservación, así como das propias cidades patrimonio. A mensaxe é clara: preservar os centros históricos require acción, vixilancia e corresponsabilidade social.
