A Sección Sexta da Audiencia Provincial da Coruña, con sede en Santiago de Compostela, condenou a dous anos de prisión un home como autor dun delito de abuso sexual ocorrido no ano 2021, tras coñecer a vítima a través da aplicación Tinder. A sentenza, que aínda non é firme, contempla tamén sete anos de afastamento e prohibición de comunicación coa vítima, dous anos de liberdade vixiada e unha indemnización total de 29.000 euros polos danos causados.
Segundo recolle o fallo, a resolución baséase no artigo 181.1 e 2 do Código Penal na súa redacción vixente no momento dos feitos, e foi emitida tras valorar como coherente, persistente e verosímil o testemuño da muller.
Os feitos sucederon na vivenda onde o acusado pasaba a noite, lugar ao que acudira a vítima. Alí, tras tomar unha medicación que lle produciu somnolencia, a muller acabou durmida. O tribunal considera probado que, nun momento posterior, “volveu en si” ao percibir contacto na súa zona perineal, decatándose de que estaba espida e de que o home se atopaba tras ela, sen roupa da cintura para abaixo.
A Sala destaca que en ningún momento existiu consentimento expreso nin implícito para manter relacións sexuais, e subliña que a actuación do acusado non contou co acordo da vítima, que non manifestou vontade algunha nese sentido.
Na súa fundamentación, os maxistrados afirman que non se detectan motivos espurios nin patoloxías mentais que poidan poñer en dúbida a testemuña da muller, e sinalan que os feitos tiveron consecuencias psicolóxicas demostrables. O tribunal recolle que a vítima experimentou unha descompensación do seu estado previo, que derivou en atención médica, prescrición de psicofármacos, tratamento continuado e mesmo internamento psiquiátrico.
Por iso, impón ao condenado o pagamento dunha indemnización de 14.000 euros polos danos psicofísicos e 15.000 polos danos morais. A sentenza podería ser recorrida ante o Tribunal Superior de Xustiza de Galicia (TSXG).
