A Plataforma Cidadá por un Senado de Progreso presentou en rolda de prensa un manifesto no que chama a participar nas eleccións á Cámara Alta e pide o voto para a candidatura unitaria Senado de Progreso. A iniciativa defende que a Cámara pode desempeñar un papel decisivo na protección dos dereitos sociais e das liberdades democráticas, e propón que os senadores elixidos en Galicia se agrupen para defender os intereses do país.
Na comparecencia interviñeron o economista e histórico militante do Partido Comunista de Galicia Pancho Candela, a escritora Marilar Aleixandre, o sindicalista Xosé Manuel Sánchez e o escritor e expresidente do Ateneo de Pontevedra Xaime Toxo.
UN CHAMAMENTO A CONCENTRAR O VOTO DA ESQUERDA
“A ultradereita está asomándose ao poder”, advertiu Candela ao abrir a rolda de prensa. O economista explicou que a plataforma nace para apoiar a confluencia das forzas de esquerda arredor da candidatura ao Senado e para dar visibilidade ao papel da Cámara Alta nas decisións que afectan á cidadanía. Tamén cuestionou a ausencia na candidatura dalgunhas formacións que reivindican a defensa de Galicia e apelou ás bases e á militancia de toda a esquerda para que apoien a lista unitaria.
Candela acusou o PP de utilizar o Senado para “obstruír, recortar e retrasar” e advertiu de que unha alianza con Vox podería agravar esa dinámica. O manifesto cita as demoras na tramitación da amnistía e os vetos en materia orzamentaria e de vivenda, e alerta de posibles retrocesos nas pensións e na sanidade pública.
Toxo enmarcou a convocatoria no avance da extrema dereita en España, na Unión Europea e nos Estados Unidos. O escritor advertiu do risco que, ao seu xuízo, ese avance supón para os principios democráticos e o Estado do benestar. “Dispersar o voto é ningunear o voto”, resumiu. Sánchez insistiu na transcendencia da convocatoria. “Estas non son unhas eleccións calquera”, afirmou o sindicalista, que advertiu da posibilidade de que chegue ao Goberno o que cualificou de “ultradereita neofascista”.
O “EXÉRCITO DOS VAGALUMES” E O EMPREGO PARA A MOCIDADE
“O que estamos propoñendo á cidadanía é votar pola luz e pola alegría”, afirmou Marilar Aleixandre, que recuperou a imaxe do “exército dos vagalumes” de Manuel Rivas para explicar o sentido da candidatura. A escritora sostivo que, nas eleccións de 2023, a suma dos votos da esquerda superou a do PP nas provincias da Coruña e de Pontevedra. Segundo os seus cálculos, concorrer en conxunto podería darlles tres escanos en cada unha desas provincias e abrir a porta a obter representación en Lugo.
Aleixandre reclamou oportunidades de traballo para que a mocidade poida quedar en Galicia e sinalou o emprego como unha das vías para afrontar a despoboación das aldeas. “Galicia ten posibilidades reais, o que fai falta é desenvolvelas”, afirmou, antes de pedir o apoio de toda a xente de esquerdas e de quen “teña a Galicia no corazón”.
A escritora tamén expresou a súa preocupación pola xudicialización da política. O manifesto reclama que se preserve a imparcialidade das decisións xudiciais e chama a atención sobre o papel do Senado na elección de maxistrados do Tribunal Constitucional e de vogais do Consello Xeral do Poder Xudicial durante a vindeira lexislatura.
UNHA AGRUPACIÓN DE SENADORES POR GALICIA
A plataforma reivindica o Senado como unha cámara de diálogo e cooperación entre comunidades autónomas que poida contribuír a corrixir os desequilibrios económicos e sociais e procurar un financiamento xusto para Galicia.
Para levar esa proposta á Cámara Alta, o manifesto pide que as senadoras e os senadores elixidos no país constitúan unha Agrupación de Senadores por Galicia desde a que impulsar iniciativas comúns por riba das diferenzas partidarias.

