O Concello de Santiago de Compostela anunciou novas medidas para fomentar a rehabilitación de edificios en estado de ruína, especialmente no casco histórico da cidade. O concelleiro de Urbanismo, Vivenda e Cidade Histórica, Iago Lestegás, explicou que o goberno municipal empregará dúas ferramentas urbanísticas para actuar sobre os inmobles abandonados: o Rexistro de Soares e a delimitación de áreas de actuación prioritaria.
Segundo Lestegás, o Rexistro de Soares permitirá que os edificios cuxos propietarios non cumpran coa súa obriga de conservación e uso poidan ser postos á venda de maneira forzosa. “A finalidade principal non é que os adquira a administración, senón que un terceiro os compre e os rehabilite”, afirmou. O concelleiro indicou que, actualmente, hai 50 edificios con declaración de ruína na cidade histórica, moitos deles desde hai máis dunha década, e que se está a revisar cales aínda seguen en mal estado.
Por outra banda, a delimitación das áreas de actuación prioritaria permitirá expropiar aqueles inmobles en situación de abandono prolongado. “Ambas ferramentas son complementarias e non se utilizaran antes en Santiago, pero son necesarias para evitar que o patrimonio siga deteriorándose”, destacou Lestegás, quen afirmou que a intención do Concello é aplicar estas medidas durante este mandato.
En canto aos prazos, os compradores dos edificios postos en venda forzosa deberán solicitar a licenza de rehabilitación en tres meses, iniciar as obras nun ano e rematalas en dous anos. No caso de incumprimentos por parte dos adxudicatarios, os inmobles poderían volver ao Rexistro de Soares.
60 VIVENDAS DE PROMOCIÓN PÚBLICA EN EXECUCIÓN
A alcaldesa de Santiago, Goretti Sanmartín, tamén se referiu á problemática da vivenda nun acto celebrado este martes no Castiñeiriño, onde destacou o avance das obras de 60 vivendas de promoción pública na cidade. “Estas vivendas levaban moito tempo agardándose, e por fin comezan a ser unha realidade”, afirmou.
Sanmartín puxo en valor a colaboración entre administracións para aumentar a oferta residencial en Santiago, mencionando iniciativas como o desenvolvemento urbanístico en Xoán XXIII e a cesión de dúas parcelas na Volta do Castro ao Instituto Galego de Vivenda e Solo para futuras promocións.
Ademais, a alcaldesa subliñou o compromiso municipal coa rehabilitación de inmobles a través dun orzamento de máis de 4 millóns de euros para 2025, destinados á recuperación de vivendas en zonas como Calderería e Moniña. Tamén se referiu á importancia de declarar Santiago como zona de mercado residencial tensionado, unha medida que permitiría aplicar controis sobre os prezos do alugueiro.
“O dereito á vivenda é unha prioridade para este goberno”, asegurou Sanmartín, quen animou aos propietarios a manter os seus edificios en bo estado e contribuír á mellora do parque inmobiliario compostelán.
