Investigadores da USC levan máis de dúas semanas ocupando espazos da Facultade de Xeografía e Historia, en resposta aos acontecementos en Gaza dende outubro de 2023 que conmoveron á comunidade internacional. A ocupación, que inicialmente contou co respaldo do Decanato e non interrompeu o traballo do persoal da facultade, enfronta agora unha nova realidade.
Coa chegada do período de exames e a extensión da protesta a máis aulas, o Decanato revisou a súa posición inicial e condenou as accións que previamente apoiara. Un comunicado recente asinado polo decano destaca un cambio de postura, expresando o desexo de que a acampada se disolva. Ademais, a dirección da facultade contempla agora o peche do edificio alegando problemas estruturais de longa data na biblioteca e niveis elevados de radón, cuestións que, segundo aseguran os propios investigadores, “son coñecidas e desatendidas dende hai décadas”. “A súbita preocupación decanal pola seguridade do persoal e do patrimonio do centro non pode deixar de sorprendernos, á vista de que nada se fixo tampouco por paliar os desproporcionados niveis de radón tamén presentes nel”, explican os asinantes.
O colectivo de investigadores implicados na ocupación, que asinaron un comunicado, afirman sentirse sorprendidos pola repentina preocupación do decanato e acusan a dirección de usar estes problemas estruturais como escusa para terminar coa protesta. Reclaman que a situación se resolva sen manipulacións mediáticas, ameazas ou medidas autoritarias e insisten en que as deficiencias citadas non deben ser usadas para negar o seu dereito a protestar.
Os investigadores reafirman o seu compromiso cos principios da mobilización en solidariedade co pobo palestino, demandan o cesamento da hostilidade contra a acampada e esixen respecto polo dereito á protesta. Adicionalmente, solicitan que se poña fin á difamación do colectivo mobilizado a través dos medios de comunicación e rexeitan o uso das condicións preexistentes do edificio como medida de presión contra a súa causa. A declaración conclúe ratificando o apoio inquebrantable ás compañeiras involucradas na protesta.
