A directora xeral de Formación Profesional, Eugenia Pérez, reuniuse hoxe cos representantes da Fondation Amigo, Nathalie Chaix, Juan Carlos Hergueta e Manuel Montesinos, para facer seguimento do acordo de colaboración coas escolas de FP de Santiago de Compostela. Este convenio, enmarcado na aposta do Goberno galego por potenciar a FP Dual Intensiva, permite que os estudantes combinen a súa formación con prácticas remuneradas en empresas. No encontro participaron tamén os directores dos centros integrados de FP de Compostela e Politécnico, Ramiro Esparís e Nicolás Espasandín.
O pasado curso, un total de 19 alumnos dos ciclos de grao medio en Atención a persoas en situación de dependencia e de grao básico en Carpintería e Moble beneficiáronse desta modalidade. Parte do alumnado recibiu ofertas de traballo nas empresas onde realizaron as prácticas, mentres que a maioría optou por continuar os seus estudos na FP galega.
Dado o éxito do programa, este ano a colaboración coa Fondation Amigo ampliarase á familia de Artes Gráficas no CIFP Compostela, segundo anunciou a directora xeral.
No caso do CIFP Compostela, oito alumnas do ciclo de grao medio en Atención a persoas en situación de dependencia completaron o programa e seis delas recibiron propostas de emprego. Empresas como Aspas, AGADEA, MISELA e delegacións de Servisenior en Santiago e Brión colaboraron nesta formación.
Pola súa banda, no CIFP Politécnico de Santiago, 11 alumnos de Carpintería e Moble participaron no programa, con dez titulados. Tres deles foron contratados polas empresas colaboradoras, entre as que destacan Carpidiser, Carpintería Marquéz, Carpintería Senin, e outras do sector.
A directora xeral destacou a importancia deste tipo de formación para mellorar as oportunidades laborais do alumnado e agradeceu a implicación das empresas que fan posible esta iniciativa.
