Bertamiráns continúa esta semana co protagonismo dentro do programa “Ames en Festas 2025”, que agrupa as celebracións da Madalena no Milladoiro e da Peregrina en Bertamiráns. Tras a clausura dos festexos no Milladoiro, o foco está agora no parque do Ameneiral, que acollerá dous dos eventos máis sinalados da programación: o concerto de Mondra, este venres 8 de agosto ás 22:00, e a terceira edición da Romaría Urbana, prevista para o sábado 9 de agosto.
O artista Mondra, natural do veciño concello de Teo, traerá a Bertamiráns o seu novo disco De Ronda, un traballo composto por once temas nos que combina elementos actuais co son tradicional galego, creando un estilo moi recoñecible que o consolidou como unha das voces con máis proxección da escena musical galega. A súa actuación no parque do Ameneiral será de acceso libre e espérase unha elevada participación veciñal.
A seguinte cita será o sábado coa Romaría Urbana, unha proposta que busca achegar o espírito das festas populares ao centro urbano, dinamizando tanto o comercio local como a hostalaría. A actividade comezará a partir das 13:30 horas cunha sesión vermú, e contará cunha programación musical continua ao longo da xornada, con actuacións dos grupos Tabernarias (13:00), Arde (14:30), Monoulious Dop (19:30), Luis Fercán (21:00) e Biribirlocke (22:20).
Ademais da música, o evento ofrecerá propostas gastronómicas como empanada e churrasco, obradoiros de xogos para adultos, e inchables e actividades infantís para os máis pequenos. A organización anima á veciñanza a acudir vestida con camisas fuleiras, que marcan o código de vestimenta desta edición, para contribuír ao ambiente festivo da xornada.
O Concello de Ames, a través dos departamentos de Cultura e Mocidade, continúa así a aposta por un modelo de festa integrador, que conecta ás distintas parroquias do municipio e promove o relevo cultural e artístico da mocidade galega. A programación da Peregrina prolongarase ata o domingo 10 de agosto, poñendo o ramo a unha nova edición das festas conxuntas de “Ames en Festas”, que este ano chegan á súa cuarta edición.
