A Asociación de Pacientes e Usuarios do CHUS denunciou este luns un novo episodio de colapso nas Urxencias do Hospital Clínico Universitario de Santiago, que segundo o colectivo afectou a un número elevado de persoas con patoloxías graves. A entidade asegura que ás 14:00 horas do 5 de agosto había 13 pacientes graves situados nos corredores do servizo, e que ás 16:00 aínda permanecían alí 10 destas persoas, mentres que 29 pacientes agardaban un ingreso hospitalario.
Ver esta publicación en Instagram
A asociación, que afirma contar con probas gráficas da situación, sostén que este tipo de episodios non son illados nin ocasionais, senón que obedecen a un “problema estrutural” no funcionamento do hospital, acentuado pola falta de reacción da administración sanitaria. “Só denunciamos os colapsos cando contamos con información fiable, pero son moitos máis dos que saen á luz”, afirman.
Segundo os datos ofrecidos polo propio Sergas, 480 persoas foron atendidas nas Urxencias do CHUS entre as 8:00 do domingo e as 8:00 do luns, e 71 delas requiriron ingreso hospitalario. A pesar diso, o organismo sanitario asegurou que ningunha das unidades hospitalarias superou o 90% de ocupación de camas, unha afirmación que a asociación cuestiona, ao considerar que existen demoras “inexplicables” nos ingresos mesmo cando hai espazos dispoñibles.
O colectivo atribúe tamén o aumento da presión asistencial ao peche de consultas e á redución de persoal nas áreas de Atención Primaria durante os meses de verán, o que estaría a provocar esperas excesivas para consultas ordinarias e derivacións innecesarias a Urxencias. Esta situación, advirten, agrávase especialmente nun contexto como o de Santiago e a súa contorna, con alta afluencia turística no verán.
“Non se reduce o número de persoas que precisan atención, senón todo o contrario”, sinalan, advertindo que a resposta da administración continúa a ser insuficiente. Denuncian tamén que se manteñen estratexias de ocultación e que as autoridades sanitarias seguen priorizando os indicadores estatísticos sobre a atención directa á cidadanía.
A Asociación de Pacientes e Usuarios do CHUS volve pedir unha revisión urxente do modelo de atención, máis recursos humanos e materiais, e unha planificación estival que non implique recortes encubertos na capacidade asistencial do hospital. “Levamos anos advertindo do mesmo e a situación repítese cada verán, sen que se adopten solucións reais”, conclúen.
