A Cidade da Cultura de Santiago de Compostela será o escenario dos Energy Days, un foro de debate sobre enerxía, industria e dixitalización organizado polo Cluster de Enerxías Renovables de Galicia (Cluergal), que terá lugar entre o 8 e o 10 de outubro. O evento reunirá a máis de 600 profesionais e empresas innovadoras de toda España para presentar os últimos avances en sectores clave para o presente e futuro de Galicia.
O xerente de Cluergal, Oriol Sarmiento Díez, explicou que o obxectivo de Energy Days é crear un espazo de intercambio de coñecementos en áreas como as renovables, eficiencia enerxética, mobilidade e sustentabilidade, fomentando ademais o networking a través de actividades paralelas. O foro dividirase en tres eixes temáticos: enerxía, industria e dixitalización, abordando cuestións como o hidróxeno renovable, a eólica mariña e as tecnoloxías da Industria 4.0, incluíndo intelixencia artificial e blockchain.
O evento contará tamén cunha zona de exposicións onde as empresas poderán mostrar os seus produtos e establecer contacto con profesionais, administracións e público en xeral. As inscricións para participar están abertas na web www.energydays.es.
