O conselleiro de Educación, Ciencia, Universidades e FP, Román Rodríguez, cifrou en máis de 12 millóns de euros o investimento que a Xunta está a destinar á renovación e modernización de infraestruturas educativas en Santiago de Compostela ao abeiro do ‘Plan de nova arquitectura pedagóxica’.
O anuncio realizouse durante unha visita ao IES A Pontepedriña, onde o responsable autonómico comprobou o resultado da substitución da cuberta do edificio, unha actuación que contou cun orzamento superior aos 306.000 euros. Segundo trasladou a Consellería nun comunicado, esta intervención forma parte das medidas orientadas á mellora das condicións estruturais e funcionais dos centros.
No repaso das actuacións en marcha na capital galega, Rodríguez sinalou que se atopan en fase de licitación as obras de ampliación do IES Lamas de Abade e tamén a renovación da cuberta do IES Plurilingüe Rosalía de Castro. Ambas intervencións suman un investimento previsto de 2,1 millóns de euros.
Ademais, actualmente están en execución catro actuacións que alcanzan un importe conxunto de 5,3 millóns de euros. Entre elas inclúese a ampliación do IES Eduardo Pondal, cun orzamento de 3 millóns; a rehabilitación integral do IES Arcebispo Xelmírez II, valorada en 1,8 millóns; e a reforma do Museo Pedagóxico de Galicia, que supón un investimento de 500.000 euros.
No capítulo de actuacións xa comprometidas, o conselleiro lembrou a ampliación do Colexio Plurilingüe Cardeal Quiroga Palacios, cunha dotación de 800.000 euros, así como as melloras previstas no Centro de Educación Especial A Barcia.
Segundo indicou Rodríguez, o conxunto destas intervencións insírese nunha estratexia orientada á actualización das instalacións educativas e á adaptación dos espazos ás novas necesidades pedagóxicas.
XORNADAS SOBRE INTERNACIONALIZACIÓN EDUCATIVA
Con anterioridade á visita ao instituto compostelán, o titular de Educación participou na inauguración das xornadas formativas ‘Internacionaliza a túa escola’, un encontro dirixido a profesorado de Primaria e Secundaria centrado nos programas europeos Erasmus+ e eTwinning.
Durante a apertura, destacou o papel destes proxectos na cooperación entre centros e no intercambio de experiencias docentes, subliñando que Galicia é “un exemplo da introdución da innovación educativa nas aulas enfocada a enriquecer o modelo galego como un referente de inclusión e equidade”.
As sesións inclúen relatorios e espazos de posta en común de boas prácticas, co obxectivo de favorecer a participación dos centros educativos galegos en iniciativas internacionais e reforzar as competencias do alumnado nun contexto europeo.
