A Fundación Juana de Vega, a través da Cátedra Juana de Vega da USC, celebrará en Compostela unhas xornadas con motivo da coincidencia de dúas efemérides: os 250 anos da publicación de A riqueza das nacións, de Adam Smith, e o 40 aniversario da entrada de España e Portugal na actual Unión Europea.
As sesións terán lugar os días 5, 6 e 9 de marzo de 2026 e desenvolveranse na Facultade de Xeografía e Historia, coa participación de especialistas procedentes de España e Portugal. A actividade está aberta ao público interesado.
A obra principal de Adam Smith, publicada o 9 de marzo de 1776, estableceu as bases do pensamento económico clásico ao defender as vantaxes do libre comercio como ferramenta para mellorar o benestar colectivo. Dous séculos e medio despois, a reflexión sobre estes postulados adquire actualidade nun escenario internacional no que a principal potencia económica mundial promove políticas arancelarias orientadas á protección de sectores produtivos propios e á presión sobre determinados socios comerciais.
Desde a organización sinalan que esta evolución do contexto global contrasta coa experiencia europea iniciada coa creación dun Mercado Común e a eliminación progresiva das alfándegas entre os Estados membros, proceso no que se inscribe a adhesión de España e Portugal en 1986.
No caso galego, a incorporación á Unión Europea supuxo a entrada nun espazo económico ampliado e a desaparición práctica da fronteira económica con Portugal. Desde entón, Galicia experimentou unha evolución por riba da media estatal e mellorou a súa posición relativa en renda per cápita no conxunto das comunidades autónomas, pasando do posto 14 ao 9. O Norte de Portugal tamén rexistrou efectos asociados á integración.
A organización das xornadas considera que estes datos permiten revisar a vixencia das teses formuladas por Adam Smith en relación coa apertura comercial e a cooperación económica entre territorios.
A FIGURA DE JUANA DE VEGA
O programa conecta tamén coa traxectoria de Juana de Vega, referente do liberalismo galego no século XIX. Juana de Vega defendeu a modernización do país, a apertura ao coñecemento europeo e a inserción de Galicia nas dinámicas económicas e culturais do seu tempo.
Desde a Fundación Juana de Vega subliñan que esta liña de pensamento resulta coherente cos principios que inspiraron o proxecto europeo contemporáneo e co debate actual arredor dos modelos de integración económica.
