A Xunta de Galicia iniciou os preparativos para construír o futuro edificio do Centro Tecnolóxico de Supercomputación de Galicia (CESGA), grazas á captación de 47,7 millóns de euros de fondos europeos. Estes recursos, obtidos a través do mecanismo de Recuperación e Resiliencia no marco do PERTE Chip, destinaranse á creación dun edificio que albergue as novas infraestruturas tecnolóxicas do CESGA.
“O novo edificio debe incorporar unha serie de características técnicas singulares, propias deste tipo de infraestruturas, polo que xa estamos dando os primeiros pasos de análise coa valoración de distintas localizacións e parcelas”, afirmou o conselleiro de Educación, Ciencia, Universidades e Formación Profesional, Román Rodríguez, durante unha reunión de traballo. Nesta xuntanza participaron tamén a directora da Axencia Galega de Innovación, Carmen Cotelo; o director do CESGA, Lois Orosa; e o CEO da empresa B-Global, Lluis Gironella, dentro da rolda de contactos para coñecer experiencias de éxito relacionadas con data centers noutros países.
A creación deste novo edificio suporá un importante incremento da capacidade de cálculo e almacenamento científico do CESGA, permitindo á comunidade científica galega e ao CSIC avanzar máis rapidamente na xeración de coñecemento e na innovación en múltiples ámbitos de investigación. “Este fito amosa a gran calidade e a competitividade do proxecto do CESGA e o liderado de Galicia neste ámbito”, salientou Román Rodríguez.
O novo edificio do CESGA albergará infraestruturas tecnolóxicas actualizadas e equipos de supercomputación renovados, destacando a implantación do FinisTerrae IV. Tamén contará cunha gran infraestrutura para o almacenamento e tratamento masivo de datos científicos, respondendo así ás crecientes demandas da comunidade científica galega e do CSIC.
Ademais, os fondos europeos permitirán á Xunta despregar unha infraestrutura que facilite a exploración e explotación dos paradigmas da computación cuántica. Este proxecto permitirá profundizar en áreas como a física de altas enerxías, climatoloxía, oceanografía, ciencia de materiais, ciencias da vida, deseño de fármacos, medicina personalizada, intelixencia artificial, sustentabilidade e optimización de procesos industriais.
O proxecto proporcionará vantaxes competitivas aos grupos de investigación usuarios do nodo CESGA, que forman parte da Infraestrutura Científico e Técnica Singular (ICTS) integrada na Rede Española de Supercomputación (RES), ante a crecente demanda destes servizos.
