A sala de prensa do Concello de Santiago acolleu este luns de Entroido unha rolda informativa marcada tamén polo ambiente festivo. Antes de comezar a comparecencia, os concelleiros do BNG accederon ao espazo disfrazados cunha perruca de cores e unha camiseta co lema ‘I love Chichinabo’, acompañados dun cesto de grelos como complemento. Esta frase fai referencia ao apelativo que o líder da oposición, Borja Verea, ten utilizado para refererirse ás medidas do goberno local
Xa no plano institucional, a concelleira de Turismo, Míriam Louzao, deu conta dos asuntos abordados e aprobados na sesión ordinaria da Xunta de Goberno Local.
No eido das licenzas urbanísticas, o executivo municipal autorizou a reforma da cuberta dunha vivenda familiar na Rúa do Pico Sacro e a rehabilitación dunha vivenda unifamiliar na Rúa da Canteira de Arriba. Tamén se concedeu permiso para o cambio de uso dun local a vivenda na Praza de Nossa Senhora da Mercé, números 5 e 6.
Así mesmo, aprobáronse intervencións na fachada e nas cubertas do edificio situado no número 28 da Rúa do Pexigo de Abaixo e obras de conservación e mantemento no inmoble da Rúa da República do Salvador número 3.
A Xunta de Goberno acordou tamén autorizar a devolución de 789.321,80 euros correspondentes ás cantidades sobrantes derivadas da liquidación dos acordos vinculados ás áreas de rehabilitación integral (ARI) no marco do Plan Estatal de Vivenda 2013-2016, posteriormente prorrogado ata 2022.
Segundo explicou Louzao, máis de 629.000 euros serán reintegrados ao Ministerio de Vivenda e arredor de 160.000 á Xunta de Galicia. O Concello conta con catro ARI: a da Cidade Histórica (declarada en 1998), a do Polígono de Vista Alegre (2006), a da Ponte Pedriña (2008) e a de Vite (2016).
No desenvolvemento do plan estatal, o Concello publicou convocatorias por importe superior aos 3,9 millóns de euros destinadas á rehabilitación de edificios residenciais. Presentáronse solicitudes para 398 vivendas, concedéronse axudas por valor de 2.265.698,77 euros e xustificáronse finalmente algo máis de 1,22 millóns.
En materia de contratación, aprobouse o expediente para o servizo de lavado de vehículos da Policía Local, cun gasto máximo de 13.409,22 euros, distribuído en dúas anualidades iguais para 2026 e 2027. O procedemento será aberto simplificado.
Tamén se acordou licitar o contrato para a esterilización de gatos de colonias urbanas, cun orzamento máximo de 14.999,99 euros, igualmente mediante procedemento aberto simplificado.
No ámbito dos servizos sociais, a Xunta de Goberno adxudicou o mantemento do software de xestión integral das persoas usuarias á empresa Imatia Innovation, S.L. por un importe de 66.598,40 euros e un prazo de dous anos.
Entre as urxencias, aprobouse a licitación do servizo de operacións de desbroce, limpeza e mantemento de marxes e drenaxes de viarios, sendeiros e parcelas municipais no contorno urbano. O contrato, cun orzamento base de 70.000 euros, estará reservado a centros especiais de emprego de iniciativa social e empresas de inserción laboral.
O executivo municipal deu luz verde á prórroga por seis meses do contrato de conserxaría e limpeza en varias instalacións deportivas, subscrito con LACERA Servicios y Mantenimiento, S.A., cun gasto de 437.740,27 euros para este período.
Do mesmo xeito, prorrogouse tamén por seis meses o contrato de limpeza e desinfección de dispositivos de auga quente sanitaria e auga fría de consumo humano para o control da lexionela nas instalacións deportivas municipais, neste caso coa empresa Saniastur, S.L., por un importe de 12.100 euros.
A Xunta de Goberno aprobou solicitar á Deputación da Coruña subvencións para o funcionamento de varios centros socioculturais do ámbito rural e para o centro sociocultural do Ensanche.
No caso do programa de actividades do rural, xustifícase un gasto de 150.000 euros e solicítase unha achega de 75.000. Para o centro do Ensanche, a solicitude ascende a 140.042,13 euros sobre un gasto total superior aos 226.000 euros. A colaboración coa Deputación no rural mantense desde o ano 2000, mentres que a xestión do centro do Ensanche deriva dun acordo de cesión asinado en 2006.
CALENDARIO DAS ESCOLAS INFANTÍS MUNICIPAIS
Por último, aprobáronse os procedementos e prazos de renovación, admisión e matrícula nas escolas infantís municipais de Conxo, As Fontiñas e Meixonfrío-Algueiriños para o curso 2026-2027.
O prazo de renovación de praza e traslado do alumnado actual estará aberto entre o 2 e o 9 de marzo. As solicitudes de novo ingreso poderán presentarse a partir do 13 de marzo. A listaxe provisional de admitidos, excluídos e lista de agarda publicarase entre o 28 e o 30 de abril, mentres que a resolución definitiva farase pública entre o 18 e o 22 de maio. A tramitación poderá realizarse a través do Rexistro Xeral do Concello, tanto de maneira presencial como telemática.
