A Xunta de Goberno Local de Santiago de Compostela aprobou este luns, 26 de outubro, o novo proxecto de rehabilitación do Palacete do Espiño, cun orzamento de 1.199.302,83 euros, IVE incluído, e un prazo de execución previsto de 24 meses. A concelleira Míriam Louzao informou deste acordo durante a comparecencia posterior á reunión do executivo municipal, na que tamén abordou diferentes cuestións relacionadas coa contratación pública, os servizos municipais e a preparación do Nadal e do Xacobeo 2027.
O proxecto do Palacete, elaborado por José Ignacio Lope de Rego Uriarte, descendente do arquitecto responsable do deseño orixinal, permitirá retomar unha intervención que permanece interrompida desde 2022. O anterior contrato de obras quedou sen executar na súa totalidade e o procedemento para a súa resolución concluíu en setembro de 2024. Desde entón, o Concello traballou na actualización da documentación técnica para adaptala ás condicións nas que se atopa actualmente o inmoble.
Louzao confirmou que a Administración local dispón da partida económica necesaria para financiar a actuación, polo que o seguinte paso será iniciar o procedemento de licitación. A concelleira explicou que o responsable municipal de Obras ofrecerá ao longo desta semana unha presentación específica para dar a coñecer as características da intervención e os traballos previstos no edificio.
Entre os acordos adoptados este luns figura tamén a declaración como deserta da licitación para a reparación e acondicionamento de muros tradicionais nos parques de Bonaval e Belvís, despois de que ningunha empresa presentase unha proposta dentro do prazo establecido.
A actuación contaba cun orzamento base de 125.170 euros, IVE incluído, e o Goberno municipal pretende recorrer agora a outro procedemento de contratación para poder executar os traballos. Segundo explicou Louzao, a alternativa que se está estudando é un procedemento negociado, aínda que queda por determinar a súa modalidade concreta.
A concelleira sinalou que os servizos municipais revisaron as condicións económicas e técnicas do contrato sen atopar deficiencias que xustifiquen a ausencia de ofertas. Neste sentido, relacionou a falta de participación coas dificultades que poden presentar determinadas intervencións de rehabilitación, fronte a outras obras polas que optan as empresas. A decisión definitiva sobre a nova tramitación levarase a unha próxima Xunta de Goberno Local.
No ámbito urbanístico, o executivo autorizou ademais tres licenzas de obra maior. A primeira corresponde á reparación da envolvente e á eliminación de chanzos no acceso ao edificio situado no número 79 da rúa da Senra. A segunda permitirá rehabilitar e ampliar unha vivenda unifamiliar no número 3 da rúa da Arzúa, mentres que a terceira contempla a reparación da fachada principal e a incorporación de illamento na fachada posterior dun inmoble situado no número 20 da rúa da Trisca.
A Xunta de Goberno deu luz verde ao expediente de contratación dun servizo de depósito, custodia, xestión de arquivos e traslado de documentación municipal, cun orzamento base de licitación de 184.694 euros, IVE incluído, para un período de dous anos.
O Concello xustifica a contratación pola cantidade de expedientes que debe conservar e pola falta de espazo suficiente nas instalacións municipais. O novo servizo deberá proporcionar dependencias adecuadas para gardar os documentos, garantindo condicións de conservación que inclúan o control da temperatura e da humidade, así como medidas de protección fronte aos incendios e ás pragas.
O contrato comprenderá tamén a recollida e o envío de expedientes, de maneira que a documentación almacenada poida trasladarse ás oficinas municipais cando sexa necesaria para a actividade administrativa.
Louzao explicou que os medios dos que dispón actualmente o Concello non permiten asumir directamente todas estas funcións. Con todo, indicou que queda por confirmar se parte dos arquivos xa se atopa noutras instalacións ou se anteriormente se contrataron determinados servizos mediante contratos menores. A concelleira lembrou que as obras realizadas nas dependencias de Urbanismo obrigaron a retirar unha cantidade considerable de documentación que estaba almacenada na antiga capela utilizada tamén para reunións das comisións de patrimonio.
PRÓRROGA DO SERVIZO DE AXUDA NO FOGAR E NOVOS ACORDOS DE CONTRATACIÓN
Outro dos asuntos incorporados por urxencia foi a ampliación da vixencia do actual contrato do Servizo de Axuda no Fogar (SAF) a partir do próximo 1 de novembro. A medida manterase ata que comece a prestación do servizo por parte da empresa adxudicataria do novo contrato.
Segundo explicou a concelleira, a tramitación da nova adxudicación atópase na súa fase final, pero aínda deben completarse os trámites documentais e a formalización contractual. A prórroga pretende evitar unha interrupción do servizo mentres remata o procedemento administrativo, tendo en conta tamén os posibles prazos derivados de reclamacións.
En materia de mantemento, a Xunta de Goberno acordou emitir unha orde de continuidade á empresa Ascensores Senor, responsable dos ascensores e salvaescaleiras das instalacións municipais. O contrato foi adxudicado por 44.097,24 euros anuais e comezou a prestarse o 31 de outubro de 2022, cunha duración inicial de dous anos e a posibilidade de ampliarse outros dous.
Tamén se aprobou unha prórroga de dous anos para a subministración de uniformidade e medios técnicos da Policía Local, adxudicada a Asagres S.L. A ampliación estará vixente entre o 1 de novembro de 2026 e o 31 de outubro de 2028, mantendo as condicións contractuais existentes. As cantidades asignadas son de 153.850 euros para o lote de uniformidade e 46.149 euros para o correspondente aos medios técnicos.
O COMERCIO COMPOSTELÁN RECIBIRÁ 181.000 EUROS MEDIANTE CONVENIOS DE COLABORACIÓN
No capítulo de subvencións, o Goberno local autorizou cinco convenios destinados a entidades vinculadas á actividade comercial da cidade, cunha dotación conxunta de 181.000 euros.
O Centro Comercial Área Central e a Asociación de Empresarios e Profesionais Compostela Monumental recibirán 35.000 euros cada unha, mentres que a Asociación Punto Compostela contará cunha achega de 32.000 euros. Pola súa banda, a Asociación Enrede disporá de 4.000 euros.
A estas cantidades súmase un convenio de colaboración coa Cámara Oficial de Comercio, cun financiamento municipal de 75.000 euros.
No apartado educativo, a Xunta de Goberno tamén acordou solicitar unha axuda de 12.500 euros á Deputación da Coruña para a Escola Municipal de Música. A petición enmárcase no programa provincial de subvencións para o mantemento de conservatorios e escolas municipais de música e danza durante 2027.
