A Xunta de Goberno do Concello de Santiago aprobou a adxudicación do contrato de Dinamización e mediación sociocultural da rede de centros socioculturais (lote III) á empresa Eulen, por un importe total de 1.925.835,16 euros, IVE incluído. A contía sitúase moi próxima ao orzamento base de licitación, fixado en 1.983.165,80 euros, e representa un incremento de máis do 13% en comparación co contrato anterior.
Segundo os pregos, o lote III garante a prestación de 39.000 horas de servizo ao ano, repartidas entre distintos programas e actividades. Entre eles figuran iniciativas de xogo e ocio, con 6.000 horas anuais destinadas ás aulas de xogo e 13.000 horas para programas de ocio; clubs de tempo libre, con 4.000 horas; e actividades ordinarias vinculadas á cultura e a arte, memoria e patrimonio, natureza e sustentabilidade, así como benestar e saúde, cun total de 2.500 horas ao ano.
O contrato inclúe tamén accións de dinamización dixital e novas tecnoloxías, ás que se destinan 8.000 horas anuais, e actividades estacionais asociadas a períodos como o verán, o Nadal ou o Antroido, con 2.000 horas cada ano. Ademais, establécese unha bolsa obrigatoria de 3.500 horas anuais para actividades non regulares, que deberán executarse conforme ao previsto nos pregos.
Nas vindeiras semanas está previsto que o Concello resolva as adxudicacións dos outros dous lotes da licitación, correspondentes á atención e información ao público e á xestión da biblioteca pública José Saramago. En conxunto, a administración local destina á xestión da rede de Centros Socioculturais para os próximos dous anos un orzamento de 3.398.323,72 euros, o que supón un 24% máis que en 2021, cando a partida ascendía a 2.575.513 euros. O orzamento anual do servizo queda fixado en 1.669.161,86 euros, uns 381.000 euros máis que na actualidade.
GARANTÍA DE PAGAMENTO
En paralelo ao proceso de adxudicación, a Concellaría de Centros Socioculturais continúa a xestionar medidas para asegurar o cobro das nóminas das traballadoras afectadas por atrasos. Con este obxectivo, o Goberno local remitiu un requirimento á empresa para que acredite o pagamento dos salarios mediante os correspondentes recibos e xustificantes bancarios.
Unha vez constatada a situación de impago das nóminas de outubro, novembro e decembro de 2025, o Concello procederá á retención das cantidades adebedadas á empresa para garantir o abono destes salarios. Este procedemento repetirase coas nóminas de xaneiro e cos días correspondentes de febreiro, no caso de que persista a situación de impago.
