A segunda convocatoria dos Bonos Corazón volveu ter unha acollida masiva entre a veciñanza compostelá. Segundo explicou a concelleira de Dereitos e Servizos Sociais, María Rozas, o orzamento municipal asignado —300.000 euros— esgotouse ás 11:00 da mañá, menos dunha hora e media despois da apertura do prazo.
Rozas subliñou que esta segunda edición complementa a convocatoria realizada o pasado mes de maio, na que tamén se destinou a mesma cantidade. “En total, o Concello investiu 600.000 euros, que permitirán mobilizar arredor de dous millóns de euros en vendas nos establecementos adheridos”, explicou.
A concelleira destacou o impacto positivo da medida sobre a economía local: “Son cifras que confirman que os ‘Bonos Corazón’ son unha ferramenta moi útil para incentivar as compras no comercio de proximidade“. Engadiu, ademais, que o novo formato de dúas convocatorias anuais foi acordado co tecido comercial “para coincidir con períodos de menor actividade económica nos establecementos”.
O Concello compostelán celebrou nas súas redes sociais o éxito da iniciativa, lembrando que os bonos se esgotaron completamente ás 11:00, pouco tempo despois de activarse a plataforma.
