O Concello de Santiago trasladou á Xunta de Galicia a súa disposición para asinar un convenio de colaboración que permita incrementar o parque público de vivenda en alugueiro na cidade. A proposta, formulada pola alcaldesa Goretti Sanmartín á conselleira de Vivenda, María Martínez Allegue, inclúe tanto a cesión de parcelas municipais como a creación dun programa autonómico de investimento en adquisición e rehabilitación de inmobles para uso residencial.
Na súa resposta á carta enviada pola Consellería, Sanmartín sinalou que o Goberno local coincide coa Xunta na “necesidade urxente de incrementar o parque público de vivenda”, especialmente na modalidade de alugueiro, para a que existen 597 solicitudes rexistradas no Rexistro único de demandantes de vivenda protexida do municipio.
O Concello ofrece á administración autonómica dúas parcelas: a UER5 do SUNP-5 (A Muíña), con capacidade para 62 vivendas, e a PR4 do SUNP-4 (As Cancelas), onde se poderían construír 18 vivendas máis. A intención é que o solo se destine a vivenda protexida en alugueiro, e que a Xunta complemente esta actuación cun programa de rehabilitación que contribúa a frear a perda de patrimonio residencial da veciñanza compostelá.
Segundo explicou a rexedora, a política municipal busca mobilizar solo público e recursos económicos para promover vivenda protexida e facilitar o acceso á mesma, especialmente para persoas con menores ingresos. “A máxima prioridade é ofrecer solucións reais ao problema da vivenda en Santiago”, subliñou Sanmartín, quen expresou tamén a vontade de “avanzar con celeridade” na formalización dun acordo entre ambas administracións.
En paralelo, o Concello xa ten en marcha a cesión de tres parcelas ao Instituto Galego da Vivenda e Solo (IGVS) para a construción de vivenda de promoción pública con protección permanente: dúas no Castro de Abaixo, con capacidade para 36 vivendas, e unha en Traspaxonal, onde se prevé levantar 39 vivendas adicionais. Estas actuacións, indicou o Goberno local, forman parte da estratexia municipal para ampliar a oferta de vivenda pública e garantir un acceso máis equitativo ao alugueiro na capital galega.
