O líder do Partido Popular de Santiago, Borja Verea, reuniuse esta semana cos representantes da Cámara de Comercio de Santiago, nun encontro no que tamén participou Juan Bravo, vicesecretario xeral de Economía do PP. O obxectivo da xuntanza foi, segundo indicou Verea, “falar dos retos económicos e retos industriais que ten a nosa cidade”.
Durante a reunión, o portavoz popular alertou da situación do comercio local e subliñou que “no último ano, co goberno de BNG e CA, perdéronse en Santiago máis de cen comercios, que pecharon e que non van volver abrir, xa que non hai relevo comercial”. Considerou este dato como un sinal de alarma que require “poñer as luces vermellas” sobre a evolución económica da capital galega.
Verea fixo tamén referencia á debilidade da industria compostelá, apuntando que “a porcentaxe industrial do PIB en Santiago é a menor das cidades galegas, moi por debaixo da media de Galicia”. Ante esta realidade, defendeu a necesidade de “poñer medidas sobre a mesa” para fortalecer o sector.
Entre as propostas do PP figura a creación dunha oficina municipal de captación de investimentos, que se encargue de “acadar, mimar e buscar todos eses investimentos que poidan chegar á nosa cidade” e de facilitar a súa implantación. Ademais, Verea comprometeu que, con un goberno popular, Santiago contaría cunha Concellería de Industria específica, “dedicada única e exclusivamente a mellorar o tecido industrial da cidade e a porcentaxe industrial do PIB, que é moi baixa, o que supón unha débeda que temos todos con Santiago”.
Finalmente, o portavoz popular anunciou tamén a intención de crear un fondo municipal de capital-risco local, destinado a “fidelizar todos os proxectos que xeren emprego e valor engadido na capital de Galicia”.
