O Concello de Santiago considera que a Xunta de Galicia ignorou deliberadamente os argumentos e datos presentados para a declaración da cidade como zona de mercado residencial tensionado. Así o asegurou hoxe o concelleiro de Urbanismo, Iago Lestegás, nunha comparecencia na que cualificou de “resolución inmotivada” o escrito remitido polo Instituto Galego da Vivenda e Solo (IGVS), co que se dá por desistida a petición do goberno municipal.
O edil comezou afirmando que “Santiago non desiste, nin vai desistir” desta solicitude, e cualificou de “anómala” a situación creada pola Xunta, que —segundo sinalou— comunicou antes aos medios a súa decisión que ao propio Concello. Lestegás sostén que a resolución da Xunta carece de argumentos técnicos e evidencia unha “intencionalidade política” por parte do Partido Popular, contraria á aplicación das medidas de contención de prezos recollidas na Lei polo Dereito á Vivenda.
Lestegás contrapuxo as “trece páxinas de resposta detallada” presentadas polo Concello o pasado 23 de xullo ás “tres páxinas parcas” da resolución autonómica. Segundo o concelleiro, esa resposta municipal rebatía de forma minuciosa todas as observacións feitas pola Xunta no seu requerimento de emenda. “Ninguén redacta un documento tan extenso e fundamentado se ten intención de desistir”, indicou.
O goberno local considera que a cidade cumpre amplamente os requisitos legais, especialmente no que respecta á evolución dos prezos do alugueiro. A diagnose presentada recolle que entre 2019 e 2024 o prezo medio de arrendamento aumentou un 40,5%, mentres que o IPC galego medrou un 20,8% no mesmo período. “Só con ese dato xa debería declararse Santiago como zona tensionada”, recalcou o edil.
Outro dos puntos que o Concello considera malinterpretados é a proposta de redefinir a figura de gran posuidor, reducindo o limiar de 10 a 5 inmobles. A Xunta asegurou que esta medida afectaría só a 100 vivendas, algo que Lestegás cualificou de “falso”. Segundo os datos achegados polo goberno local, serían máis de cen as vivendas afectadas en propiedade exclusiva, e moitas máis se se consideran porcentaxes de copropiedade. Lestegás lembrou que outros territorios como Navarra e Euskadi, así como a cidade da Coruña, incluíron esa mesma definición nas súas solicitudes.
O concelleiro tamén criticou que a Xunta cuestione o uso de datos procedentes dun portal inmobiliario, cando —segundo defendeu— estes non só complementan os datos oficiais, senón que permiten unha análise máis detallada a nivel inframunicipal. Engadiu que boa parte da información recollida procede do propio IGVS e que esta foi empregada no informe técnico encargado a un grupo de investigación da Universidade da Coruña, o cal o Concello considera unha garantía de obxectividade e rigor.
Sobre as críticas do sector inmobiliario, que advirten dunha posible desviación dos contratos cara ao alugueiro de tempada, Lestegás recoñeceu que existe unha lagoa legal na Lei de Arrendamentos Urbanos, mais subliñou que os contratos deben estar debidamente xustificados para non incorrer en fraude.
Lestegás confirmou tamén que o Concello non descarta presentar recurso administrativo nin tampouco acudir á vía xudicial para reverter a decisión da Xunta, e reiterou a disposición do goberno municipal para manter reunións co IGVS co obxectivo de desbloquear o procedemento. “Imos facer todo o necesario para que Santiago sexa declarado zona tensionada. Non queremos que esta solicitude quede no limbo”, concluíu.
