A edición número 39 de Cineuropa celebrarase en Santiago do 7 ao 23 de novembro con arredor de 139 títulos e un programa que combina estreas, sección oficial competitiva e actividades paralelas nas sedes habituais: Teatro Principal, Salón Teatro, Auditorio de Galicia, NUMAX e Zona C. Así o anunciaron nunha rolda de prensa no Pazo de Raxoi a concelleira de Capital Cultural, Míriam Louzao; a deputada provincial de Cultura, Natividade González; e o director do certame, José Luis Losa.
Louzao enmarcou a cita como un encontro co cinema entendido como linguaxe compartida e como resistencia cultural. “O festival mantén a súa aposta pola diversidade, pola reflexión e pola emoción compartida”, sinalou, defendendo a creación feminina e as voces disidentes como un dos piares do programa. A responsable municipal avanzou que o fío condutor desta edición será o amor, non como tópico romántico, senón como forza transformadora e vínculo social, e resumiu a proposta como unha defensa da experiencia colectiva de ver cinema en sala fronte ao consumo fragmentado.
O calendario de publicacións prevé que o venres 31 de outubro se faga público o catálogo dixital co detalle de proxeccións, seccións e actividades, mentres que as entradas sairán á venda o mércores 05 de novembro, tanto en liña como nos puntos habituais. Louzao agradeceu o apoio do Consorcio da Cidade de Santiago, da Deputación da Coruña e das entidades colaboradoras, e subliñou o papel do público: “Sen o público non tería ningún sentido”.
Dende a Deputación, Natividade González puxo o foco na traxectoria do festival e na cooperación institucional: “Sen ese traballo conxunto e sen as liñas de axuda que sosteñen o tecido audiovisual galego sería imposible manter vivo un proxecto da dimensión e calidade de Cineuropa”. Para González, a cita forma parte da memoria colectiva de Compostela, atrae novos públicos cada novembro e reforza a identidade cultural da cidade.
Pola súa banda, José Luis Losa cualificou a colleita de 2025 como “singularmente apreciable” e avanzou estreas recoñecidas nos grandes festivais internacionais, con premios como León de Ouro (Venecia), Oso de Ouro (Berlín) ou Leopardo de Ouro (Locarno) presentes na grella. Entre os nomes mencionados figuran Paolo Sorrentino, Jim Jarmusch, Olivier Assayas, Richard Linklater, Lucrecia Martel, Joachim Trier e Kleber Mendonça Filho. A apertura será con The president’s Cake, ópera prima de Hasan Hadi, un director iraquí, premiada coa Cámara de Ouro en Cannes, mentres que a clausura correrá a cargo de Así chegou a noite, do galego Ángel Santos, en estrea en Galicia.
A sección oficial competitiva reunirá once longametraxes de once países (entre outros, Paraguai, Francia, Romanía, Hungría, Serbia, Bélxica, Reino Unido, España, Perú, Indonesia e Suíza), reforzando a idea de mosaico multicultural que a organización quere destacar este ano. No capítulo de recoñecementos, o Premio Cineuropa será para Jaione Camborda, e o festival homenaxeará ao cineasta Kamal Aljafari —pola súa prolongada exploración da memoria palestina— e a Jonás Trueba, cun vínculo histórico co certame dende as súas primeiras películas. “Parécenos especialmente axeitado recoñecer esta traxectoria”, apuntou Losa sobre Aljafari, lembrando a súa presenza en Locarno.
No apartado de retrospectivas, programarase un ciclo dedicado a Faye Dunaway, que, segundo explicou Losa, “se enfrontou a Hollywood” e defendeu con determinación a súa independencia profesional. O ciclo temático da edición xirará arredor do amor en sentido amplo —”o cinema do odio non é o que defendemos no festival”, dixo o director—, con 39 películas que exploran as distintas formas de vínculo e afecto.
A liña de memoria e debate incluirá o documental Bajo las banderas, el sol (estreado na Berlinale), con imaxes inéditas de Alfredo Stroessner e un coloquio co director Juanjo Pereira e un politólogo paraguaio, para pensar as ditaduras esquecidas de América do Sur. Ademais, lembrarase o 50 aniversario da folga de intérpretes de 1975, con referencias a Tina Sainz, Enriqueta Carballeira, José Carlos Plaza ou Petra Fernández, para abordar a relación entre dereitos laborais e cultura no final do franquismo.
O cinema galego terá presenza destacada con obras de Ángel Santos, Iván Castiñeiras, Antonio Caeiro ou Andrea Zapata-Girau, entre outros, reforzando a idea de territorio de creación e risco. Louzao resumiu o espírito da edición cun convite ao público a recuperar a liturxia de novembro: “Amar o cinema tamén é amar a liberdade que o fai posible”.
A programación completa poderá consultarse en cineuropa.gal, co detalle de seccións, horarios e actividades especiais. A organización lembra que o festival combinará proxeccións, encontros, debates, sesións especiais e concertos, co obxectivo de afondar nos procesos de creación e de ampliar a experiencia das persoas asistentes.
