O Concello de Ames celebra a súa sexta edición da Semana Europea da Mobilidade, que terá lugar entre os días 20 e 22 de setembro. Baixo o lema “Espazo público compartido”, a campaña busca fomentar o uso de medios de transporte sostibles e promover a mobilidade activa e o transporte público. Entre as actividades destacan a xa tradicional marcha ciclista nocturna, unha sesión musical a cargo de DJ WANA e unha andaina pola senda verde entre O Milladoiro e Bertamiráns.
A marcha ciclista nocturna converteuse na protagonista desta edición, reunindo máis de 230 participantes, a pesar da chuvia que marcou a xornada do venres. O concelleiro de Mobilidade, Víctor Fernández, valorou positivamente o aumento da participación ano tras ano, destacando o carácter familiar da actividade, que ‘axuda a concienciar aos máis pequenos sobre a importancia do deporte e o uso de medios de transporte sostibles’.
O alcalde Blas García agradeceu a colaboración da Policía Local e Protección Civil para garantir a seguridade da marcha e animou á veciñanza a participar nas actividades programadas para o resto da fin de semana, como a andaina pola senda verde o domingo, que contará con servizo de autobús para facilitar o traslado entre O Milladoiro e Bertamiráns.
A Semana Europea da Mobilidade busca sensibilizar á poboación sobre a importancia de reducir a pegada ecolóxica mediante o uso de transporte público e medios de transporte limpos, como a bicicleta ou o desprazamento a pé.
