O Pleno do Concello de Brión abordará este mércores, 7 de outubro, ás 13:00, a aprobación dos Orzamentos Municipais de 2026, que alcanzan os 9.246.501,20 euros. As contas, que serán tratadas nunha sesión extraordinaria, aumentan un 18,98% respecto das de 2024, cando o presuposto municipal ascendeu a 7.771.316,63 euros.
O alcalde, Pablo Lago, presenta as contas como as máis elevadas ata o momento no municipio e defíneas como un presuposto “equilibrado e que cumpre con todas as regras esixidas polo Estado; realista e social, xa que incrementa no posible as partidas destinadas aos distintos servizos á veciñanza; e investidor, xa que aumenta a partida de investimentos reais”.
O Goberno local destaca ademais que o Concello non mantén débeda e sinala o reforzo das partidas vinculadas á seguridade e á mobilidade cidadá, aos servizos sociais, á sanidade, á cultura, á educación e ao deporte. Segundo Lago, estas políticas experimentan incrementos superiores ao 20%, cos que o Concello pretende manter e ampliar os servizos municipais.
Un dos principais aumentos prodúcese no capítulo de gasto corrente, que medra un 26,08% e chega aos 3.854.961,37 euros. Dentro desta cantidade, unha das partidas de maior peso corresponde ao servizo de axuda no fogar (SAF), ao que o Concello reserva 608.000 euros durante o próximo exercicio.
537.000 EUROS PARA O CAMPO DE FÚTBOL DE BASTAVALES
No apartado de investimentos, as contas municipais recollen 537.000 euros para a reforma do campo de fútbol municipal de Bastavales. A planificación económica incorpora tamén preto de 200.000 euros para actuacións nas redes de saneamento e abastecemento de Romarís, Brión, Santa Minia e Sabaxáns.
A mellora da rede viaria contará, pola súa banda, con medio millón de euros para estradas e accesos aos núcleos de poboación. Estas cantidades súmanse a outras actuacións de maior volume económico que xa están en marcha ou próximas á súa finalización e que, polo tanto, non forman parte das novas previsións orzamentarias nas mesmas condicións.
Entre elas atópase a humanización da estrada AC-524 ao seu paso polos Ánxeles, cun investimento de 1,1 millóns de euros e cuxas obras están próximas a rematar. Tamén continúa en execución o proxecto de mellora da eficiencia enerxética e renovación do alumeado público municipal con tecnoloxía LED, que mobiliza 2,48 millóns de euros.
PEDROUZOS QUEDA FÓRA DO ANEXO INICIAL
O capítulo de investimentos reais presenta unha redución nas contas que o Goberno municipal relaciona co momento no que foi elaborado o documento. O Concello explica que, no caso de varias actuacións, as cantidades consignadas xa non corresponden ao crédito inicial previsto para as obras, senón aos importes resultantes da súa adxudicación.
Tampouco aparecen neste apartado investimentos obtidos nos últimos meses, entre eles os 1,19 millóns de euros destinados á mellora e acondicionamento do complexo deportivo municipal de Pedrouzos. Segundo explica o alcalde, a incorporación desta actuación ao anexo suporía por si mesma un incremento do 72% respecto dos investimentos contemplados nas contas de 2024.
