O Concello de Brión fixo un chamamento á colaboración da veciñanza para limitar o consumo de auga potable ante o incremento da demanda rexistrado nos últimos días e a actual situación de seca. A Administración local busca así preservar as reservas dispoñibles e asegurar a normalidade do abastecemento en todo o municipio durante este período de altas temperaturas.
Segundo explica o Concello, nas últimas xornadas detectouse un aumento significativo do consumo, relacionado especialmente con actividades como o rego de xardíns e zonas verdes, o enchido de piscinas e outros usos que non resultan imprescindibles. A situación coincide ademais co escenario de seca sobre o que xa advertiu Augas de Galicia.
As previsións meteorolóxicas para estes días, con temperaturas elevadas, poden incrementar aínda máis a demanda. Por este motivo, o Goberno municipal lembra que a auga é un recurso limitado que debe reservarse prioritariamente para os usos básicos e necesarios.
As recomendacións permanecerán vixentes ata novo aviso. Entre as principais medidas solicitadas á cidadanía figura evitar o rego de xardíns, hortas, céspedes e demais espazos verdes, así como non encher piscinas mentres persista esta situación.
O Concello tamén pide deixar para máis adiante o lavado de vehículos e evitar empregar auga procedente da rede municipal para a limpeza de beirarrúas, patios, fachadas ou outros espazos exteriores. A petición esténdese a calquera actividade non esencial que implique un consumo elevado de auga potable.
Estas indicacións teñen carácter preventivo e pretenden conseguir unha redución significativa da demanda antes de que sexa necesario aplicar limitacións de maior alcance. O Concello insiste, neste sentido, na importancia da responsabilidade individual para manter o servizo con normalidade para o conxunto da poboación.
A Administración municipal mantén contacto permanente con Espina e Delfín, empresa concesionaria do servizo no municipio, para realizar un seguimento diario da evolución do consumo e da situación do abastecemento.
O Concello advirte de que, no caso de que as recomendacións non permitan reducir suficientemente o gasto de auga, poderían adoptarse medidas máis restritivas co obxectivo de garantir o subministro á totalidade da veciñanza.
