A Sala do Civil e Penal do Tribunal Superior de Xustiza de Galicia (TSXG) confirmou a sentenza da sección sexta da Audiencia Provincial da Coruña na que condenou a dous anos e un mes de cárcere a un fisioterapeuta de Santiago por abusar sexualmente dunha paciente. A Sala tamén ratificou a imposición dunha indemnización de 10.000 euros á vítima.
En outubro de 2020, segundo recolle a sentenza e informa o alto tribunal galego, o investigado estaba a tratar á denunciante por unha dor de costas e, durante a sesión, na que se atopaban sós, abusou dela.
O TSXG determina que a declaración da denunciante é crible, pois narra os feitos de forma clara e precisa, descártanse motivacións espurias, existe unha rotunda persistencia na incriminación e conta con corroboracións periféricas.
Os maxistrados engaden na resolución que “o tratamento prestado polo fisioterapeuta á muller non requiría esa manipulación e isto é recoñecido implicitamente por el, ao negar en todo momento que levase a cabo un tocamento típico”. A sentenza non é firme pois é recurrible ante o Tribunal Supremo.
