O Concello de Boqueixón vén de lanzar unha nova campaña de compostaxe doméstica que se desenvolverá ao longo dos meses de novembro e decembro. Esta iniciativa ten como obxectivo principal reducir a pegada ecolóxica da veciñanza a través da valorización in situ dos residuos orgánicos xerados nos fogares, promovendo así unha xestión sostible dos recursos no rural.
Segundo explicou o alcalde, Ovidio Rodeiro Tato, o Concello leva anos impulsando esta práctica: “Temos repartido case un milleiro de composteiros entre os veciños e veciñas e realizado campañas de sensibilización para reducir a xeración de residuos e promover a reciclaxe. Isto non só ten beneficios ambientais, senón tamén económicos, xa que se pode transformar o lixo orgánico nun compost de calidade que serve de abono”.
Para asegurar a correcta implementación da compostaxe doméstica, o Concello programou varias charlas informativas dirixidas tanto aos actuais como aos futuros usuarios dos composteiros. Estas reunións realizaranse por parroquias e incluirán visitas aos fogares dos usuarios e usuarias que xa empregan composteiros, así como sesións formativas no CPI Antonio Orza Couto. Ademais, instalarase un punto informativo na Feira de Lestedo.
A veciñanza será informada destas actividades a través dos medios habituais do Concello e chamadas telefónicas aos usuarios do programa. Os interesados en sumarse á iniciativa poden poñerse en contacto por correo en biorresiduos@concellosostible.gal ou no teléfono 699 526 341.
UN COMPROMISO CO MEDIO AMBIENTE E A ECONOMÍA CIRCULAR
Dende 2013, o Concello de Boqueixón promove a participación activa da cidadanía na xestión responsable dos residuos orgánicos. Grazas á compostaxe doméstica, redúcese a cantidade de residuos que deben ser transportados a vertedoiros, favorecendo así unha economía circular que permite converter os restos de alimentos en abono natural de alta calidade. A redución destes residuos tamén supón unha menor frecuencia de recollida e, polo tanto, unha diminución das emisións de CO₂.
Esta campaña conta co apoio da Xunta de Galicia e do Ministerio para a Transición Ecolóxica, dentro do Plan de Recuperación, Transformación e Resiliencia, con financiamento da Unión Europea a través dos fondos NextGenerationEU.
