A conselleira de Política Social e Igualdade, Fabiola García, participou hoxe na gala conmemorativa polo 30 aniversario de Agadea, coincidindo coa celebración do Día Mundial do Alzhéimer, o vindeiro 21 de setembro. Durante o evento, que tivo lugar no Teatro Principal de Santiago de Compostela, a conselleira eloxiou a traxectoria de Agadea e o seu compromiso como ‘un aliado fundamental na atención ás persoas con Alzhéimer en Galicia’. Tamén resaltou a colaboración da Xunta a través do financiamento dos programas da asociación.
No acto, no que tamén estiveron presentes o secretario xeral da Lingua, Valentín García, e o director xeral de Maiores e Atención Sociosanitaria, Antón Acevedo, fíxose un recoñecemento ao neurólogo Alfredo Robles, un dos fundadores de Agadea e unha referencia no tratamento desta doenza. A conselleira destacou o seu labor, así como o compromiso dos voluntarios distinguidos e de tres colexios composteláns: Cluny, Monte dos Postes e Divino Maestro.
PREMIO SIMBAD DE LITERATURA INFANTIL
Outro momento salientable da gala foi o anuncio da gañadora do Premio de literatura infantil Simbad, que recaeu en Irene Alonso Gasalla polo seu conto O novelo de Nenuca, obra que achega aos máis cativos a realidade do Alzhéimer, que afecta a máis de 70.000 persoas en Galicia. O premio, dotado con 3000 euros e coa publicación da obra, busca sensibilizar sobre esta doenza a través da literatura infantil e xuvenil.
O secretario xeral da Lingua, Valentín García, subliñou o éxito de participación no certame, destacando a súa importancia na promoción da lingua galega e a súa capacidade de conexión interxeracional. A gala contou tamén coa participación de Isabel Gey, presidenta de Agadea, e dos escritores Francisco Castro e Ánxela Gracián, padriño e secretaria do premio, respectivamente.
O Premio Simbad busca, desde a súa creación, promover a sensibilización sobre o Alzhéimer e doenzas similares, ademais de fomentar a creación literaria en galego.
