O Concello de Santiago, do mesmo xeito que en anteriores ocasións, reiterou que non prevé instalar grandes pantallas no espazo público. Así o informou aos medios tras unha nova petición do PP para proxectar en Praza Roxa a final da Eurocopa feminina, que se celebrará este domingo e na que España xoga contra Inglaterra O concelleiro popular José Ramón de la Fuente trasladou esta petición na mañá deste venres.
Nun audio remitido aos medios, apunta que a clasificación de España para a final da Eurocopa “xera unha enorme ilusión entre afeccionados e cidadanía”, polo que reclama que se poida compartir o encontro e celebrar a vitoria, se ocorre, nun lugar público.
Neste caso, suxeriu a Praza Roxa como “lugar idóneo” por ser un espazo céntrico, de fácil acceso e con capacidade suficiente para acomodar un gran número de persoas con seguridade. Este asunto xa xerou polémica o ano pasado, coa final da Eurocopa masculina. Entón, o Concello tampouco instalou a pantalla, pero si o fixo a Deputación da Coruña no seu lugar.
“Estamos seguros de que esta vez a alcaldesa non dirá que non. Trátase do combinado feminino, que leva nos últimos anos desenvolvendo un fútbol que ilusiona a afeccionadas e afeccionados e que lle levou a conquista o Mundial no 2023”, sinalou o edil do PP, antes de coñecer o novo ‘non’ do Concello.
