A asemblea xeral da Asociación de Profesores Eméritos da Universidade de Santiago de Compostela (USC) renovou en sesión extraordinaria a súa xunta directiva. Tras a presentación de candidaturas, o catedrático de Psicoloxía Social José Manuel Sabucedo Cameselle foi elixido por consenso como novo presidente. O novo equipo estará integrado por Juan Manuel Viaño Rey (Matemáticas Aplicadas) como vicepresidente; Teresa Fanego Lema (Filoloxía Inglesa) como secretaria; Laura Sánchez Piñón (Xenética) como tesoureira; e Juan Luís Barja Pérez (Microbioloxía), Adriana Gewerc Barujel (Didáctica e Organización Escolar) e Eugenio Uriarte Villares (Química Orgánica) como vogais.
Segundo destacou a USC nunha nota de prensa, a nova directiva pretende durante o seu bienio de xestión “consolidar os fins estatutarios e o labor desenvolvido polos membros fundadores”, poñendo especial énfase en visibilizar a achega do profesorado emérito nas actividades de investigación, docencia e asesoramento académico. A Asociación de Profesores Eméritos foi rexistrada na Consellería de Presidencia, Administración Pública e Xustiza da Xunta en xuño de 2019. Na actualidade conta con 51 profesores eméritos contratados e outros 52 que, tras rematar o seu período contractual, manteñen actividade e vínculo científico coa USC, contribuíndo ao desenvolvemento académico e investigador da institución.
