A concelleira non adscrita Mila Castro anunciou que o seu grupo formulará unha interpelación ao Goberno local para coñecer o grao de avance na elaboración dos novos pregos do servizo de mantemento, conservación e mellora dos espazos verdes e do arboredo municipal de Santiago de Compostela.
Segundo lembraron as edilas nunha nota remitida aos medios, o contrato actualmente en vigor foi renovado en setembro de 2021 cunha duración de tres anos e dúas posibles prórrogas. Unha vez esgotadas esas opcións, o servizo finalizará o 31 de agosto de 2026, polo que consideran necesario activar con antelación o procedemento para a súa substitución.
Castro cualificou de “imprescindible” que o executivo municipal detalle en que punto se atopa a redacción dos novos pregos e cal é o calendario previsto tanto para a súa aprobación como para a posterior licitación. A edil advertiu de que os atrasos producidos noutras contratacións municipais “obrigan a extremar a planificación para evitar situacións de urxencia que poidan afectar á continuidade do servizo; o mantemento dos parques e zonas verdes e ás condicións laborais do persoal”.
A concelleira tamén solicitou información sobre as posibles modificacións que se incluirán no novo contrato. En concreto, interesouse polas melloras previstas en materia de calidade do servizo, criterios de sustentabilidade ambiental e garantías vinculadas aos dereitos laborais do persoal adscrito á prestación.
No ámbito laboral, Castro fixo referencia á situación do convenio colectivo do sector da xardinaría, que, segundo sinalou, permanece bloqueado tras meses de negociación coa empresa adxudicataria. A este respecto, advertiu de que, no caso de non existir un novo acordo antes do peche dos pregos, “podería elaborarse un estudo económico desaxustado á realidade, sen recoñecer os custos laborais actualizados”.
